Սաուդյան նավթամուղի վրա հարձակումից հետո ԵՄ առաջնորդները մտահոգված են վառելիքի գների աճով

Եվրոպացի առաջնորդները շտապ միջոցներ են ձեռնարկում՝ զսպելու նավթի գների աճը, քանի որ Մերձավոր Արևելքում հակամարտության սրման ֆոնին Սաուդյան Արաբիայից մատակարարումները հետաձգվում կամ չեղարկվում են։ Այդ մասին տեղեկացնում է «Արմենպրես»-ը՝ վկայակոչելով Euronews-ը։

Հութիների և իրաքյան ուժերի հարձակումից հետո Սաուդյան Արաբիան ստիպված եղավ ժամանակավորապես փակել 1200 կիլոմետրանոց Արևելք-Արևմուտք խողովակաշարը, որը Հորմուզի նեղուցը շրջանցող հիմնական երթուղին է։

Այդ խափանումները սպառնում են խաթարել համաշխարհային նավթի մատակարարումների մինչև 4%-ը՝ հատկապես հաշվի առնելով այն հանգամանքը, որ Սաուդյան Արաբիայի նավթի արտադրությունը օգոստոսին արդեն իսկ զգալիորեն նվազել էր։ Միևնույն ժամանակ, Brent տեսակի նավթի մեկ բարելի գինն այժմ կազմում է 113 դոլարից բարձր։

Ֆրանսիայի և Իտալիայի համար էներգակիրների գների աճը դառնում է ներքին քաղաքականության լուրջ խնդիր, քանի որ ընտրողները կառավարությունների աշխատանքը գնահատում են՝ հիմնվելով գնողունակության վրա։

Ֆրանսիայում էներգակիրների և վառելիքի գների աճը արդեն իսկ խթանում է սպառողների անհանգստությունը։ Օգոստոսին գնաճը հասել է 2.7%-ի, իսկ էներգետիկան մնում է հիմնական շարժիչ ուժը։ Իտալիան նմանատիպ խնդրի առջև է կանգնած։ Օգոստոսին գնաճը հասել է մինչև 3.3%, բենզինի և դիզելային վառելիքի գները զգալիորեն աճել են։