Խաղաղության պայմաններում Հայաստանի զբոսաշրջային ողջ պոտենցիալն օգտագործելու խոչընդոտներ չկան. Փաշինյան

ՀՀ վարչապետ Նիկոլ Փաշինյանը կառավարության նիստում անդրադարձել է արտահանման դիվերսիֆիկացման և զբոսաշրջության ոլորտի զարգացումներին՝ ընդգծելով Հայաստանի զբոսաշրջային ներուժն ամբողջությամբ օգտագործելու անհրաժեշտությունը։

«Մենք շարունակում ենք հետևողականորեն աշխատել մեր արտահանումների դիվերսիֆիկացման ուղղությամբ, և գործընթացն ընթանում է։ Արտահանումների մասին խոսելիս, հատկապես սեզոնային գյուղմթերքի և ընդհանրապես արտադրանքի, մենք միշտ պետք է նկատի ունենանք նաև զբոսաշրջությունը, որովհետև կոնկրետ բովանդակային իմաստով զբոսաշրջությունն էլ է այդ տեսանկյունից արտահանում։ Մարդը իր երկրի սուպերմարկետից պետք է միրգ կամ բանջարեղեն ձեռք բերի, գալիս է Հայաստան և այստեղ է ձեռք բերում»,- «Արմենպրես»-ի հաղորդմամբ՝ ասել է Փաշինյանը։

Նա նշել է, որ զբոսաշրջային հոսքերը հնարավորություն են տվել կառավարելի պահել իրավիճակը և արձանագրել դրական զարգացումներ։

«Պետք է գոհունակությամբ արձանագրեմ, որ զբոսաշրջային հոսքերն այս տարի մեզ թույլ են տվել կառավարելի պահել իրավիճակը, և շատ լավ զարգացումներ ունենք զբոսաշրջության ոլորտում։ Մենք պետք է շարունակենք հետևողականորեն այս ուղղությամբ աշխատանքը»,- ասել է վարչապետը։

Փաշինյանի խոսքով՝ խաղաղության պայմաններում Հայաստանի զբոսաշրջային ամբողջ ներուժն օգտագործելու խոչընդոտներ չկան։

 «Հատկապես խաղաղության միջավայրում և խաղաղության պայմաններում կարծում եմ՝ Հայաստանի զբոսաշրջային ողջ պոտենցիալն օգտագործելու խոչընդոտներ չկան, և մենք այդ ուղղությամբ մեր աշխատանքը պետք է շարունակենք»,- նշել է նա։

Վարչապետն անդրադարձել է նաև սոցիալական ցանցերում Հայաստանի մասին հրապարակումներին՝ ընդգծելով զբոսաշրջիկների ակտիվությունը։ «Լավ լուրն այն է, որ սոցիալական ցանցերը և դրանցում մարդկանց ակտիվությունը, հատկապես այն մարդկանց ակտիվությունը, ովքեր իրենց համար բացահայտում են Հայաստանը, շատ ակտիվ զբաղված են Հայաստանի ներկայացմամբ»,- ասել է Փաշինյանը։ Նա շնորհակալություն է հայտնել Հայաստան այցելող զբոսաշրջիկներին՝ երկրի մասին իրենց հրապարակումների և ակտիվության համար։ «Շնորհակալություն եմ ուզում հայտնել բոլոր այդ զբոսաշրջիկներին ակտիվության համար և ասել, որ կառավարությունը տեսնում է այդ ակտիվությունը, գնահատում է և ուրախ է բոլորին հյուրընկալել Հայաստանի Հանրապետությունում»,- հավելել է վարչապետը։

Այս տարվա հունվար-հունիս ամիսներին Հայաստան է եկել 1 մլն 41 հազար 598 զբոսաշրջիկ, որը 2025-ի նույն ժամանակահատվածի համեմատ աճել է 14,8 տոկոսով։ Ամենաշատը Հայաստան եկել են Ռուսաստանից, Վրաստանից, Իրանից։ Առաջին տասնյակ երկրների ցանկում են Չինաստանը, Գերմանիան, ԱՄՆ-ն, Ուկրաինան, Իտալիան, Ֆրանսիան, Հնդկաստանը։