Կցանկանամ, որ Եվրոպայի լիգայում մրցենք պորտուգալական ակումբների հետ. Տուլիպա

Հայաստանի չեմպիոն «Արարատ-Արմենիա»-ի գլխավոր մարզիչ Մանուել Տուլիպայի համար Եվրոպայի լիգայի հիմնական փուլում որպես մրցակիցներ նախընտրելի ակումբները պորտուգալական թիմերն են:

«Սա շատ կարևոր է ոչ միայն «Արարատ-Արմենիա»-ի ֆուտբոլիստների, այլև հայկական ֆուտբոլի համար, քանի որ «Արարատ-Արմենիա»-ն հայկական առաջին ակումբն է, որը կխաղա ԵԼ-ի հիմնական փուլում: Երբ եկա այս ակումբ, ցանկանում էի, որ ֆուտբոլիստներս երազանքներ ունենան ու իրենց առաջ նպատակներ դնեն: Հիմա էլ չկա պատճառ, որ մենք մեզ զրկենք երազանքներից ու չգնանք մեր հաջորդ նպատակի հետևից»,- «Արմենպրես»-ի հաղորդմամբ՝ լրագրողների հետ հետխաղային մամուլի ասուլիսի ժամանակ ասաց Տուլիպան:

Վերջինիս խոսքով՝ այս խաղում «Արարատ-Արմենիա»-ն իր լավագույն խաղը չցուցադրեց՝ հատկապես առաջին կեսում, ու թիմը սխալվում էր երկար փոխանցումների ժամանակ:

«Կցանկանամ, որ Եվրոպայի լիգայում մրցենք պորտուգալական ակումբների հետ, օրինակ՝ «Բենֆիկա»-ի ու «Բրագա»-ի հետ, քանի որ հնարավորություն կունենամ տուն վերադառնալու»,- շեշտեց նա:

Ֆուտբոլի Եվրոպայի լիգայի հիմնական փուլի վիճակահանությունը կկայանա օգոստոսի 28-ին: Եվրոպայի լիգայի որակավորման 4-րդ փուլի երկրորդ խաղում «Արարատ-Արմենիա»-ն Երևանում ընդունեց ռումինական «Կրայովա»-ին ու հաղթեց նվազագույն հաշվով: Առաջին խաղն ավարտվել էր 1-1 հաշվով։