Զինծառայողի ծեծի ենթարկվելու վերաբերյալ տեղեկությունը չի համապատասխանում իրականությանը. ՊՆ-ն հերքում է տարածել
2 րոպեի ընթերցում
Ջերմուկի զորամասում 19–ամյա զինծառայողի ծեծի ենթարկվելու վերաբերյալ տեղեկությունը չի համապատասխանում իրականությանը։ «Արմենպրես»-ի փոխանցմամբ՝ այս մասին հայտնում են ՀՀ պաշտպանության նախարարությունից՝ անդրադառնալով զինվորի դաժան ծեծի մասին համացանցում տարածված լուրերին։
««Ֆեյսբուք» սոցիալական ցանցում օգտատերերից մեկը տարածել է իրականությանը չհամապատասխանող տեղեկություն։
Հորդորում ենք զերծ մնալ կեղծ և սուտ տեղեկություններ տարածելուց, ինչպես նաև հասարակության շրջանում ՀՀ բանակի հեղինակությունը վարկաբեկելուն ուղղված անհիմն փորձերից։
Նման հրապարակումները մոլորեցնում են հանրությանը՝ նպաստելով ապատեղեկատվության տարածմանը։
Զինծառայող Ա. Հ.-ի դաժան ծեծի կամ առհասարակ ծեծի ենթարկվելու վերաբերյալ տեղեկությունները սուտ են. նա զինվորական հոսպիտալ է ընդունվել այլ առողջական խնդրով:
Պաշտպանության նախարարությունը պատրաստ է Մարդու իրավունքների պաշտպանի գրասենյակի ներկայացուցիչներին ուղեկցել հոսպիտալ՝ տեղում իրականությանը ծանոթանալու նպատակով»,– հայտնել են ՊՆ-ից՝ հավելելով, որ զինծառայողը, որը զինվորական հոսպիտալ է ընդունվել այլ բնույթի առողջական խնդրով, ներկայումս գտնվում է դիտարկման և հետազոտման փուլում։
Նախարարությունից վստահեցնում են՝ զինվորի առողջական վիճակը լավ է, անհանգստացնող որևէ խնդիր չկա։
Նշենք, որ զինվորի ծեծի մասին ահազանգը հնչեցրել էր իրավապաշտպան լրագրող Ժաննա Ալեքսանյանը՝ Մարդու իրավունքների պաշտպան Անահիտ Մանասյանին խնդրելով արձագանքել արտառոց դեպքին։