Երևանի քաղաքապետի մամուլի քարտուղարն անդրադարձել է Ծառուկյանի կենդանիներին կենդանաբանական այգի տեղափոխելու շուրջ քննարկումներին

Երևանի քաղաքապետի մամուլի քարտուղար Արտյոմ Կարապետյանը հայտարարություն է տարածել՝ անդրադառնալով Գագիկ Ծառուկյանի կենդանիներին կենդանաբանական այգի տեղափոխելու որոշման շուրջ քննարկումներին։

«Արմենպրես»-ը ներկայացնում է հայտարարությունն ամբողջությամբ։

«Գագիկ Ծառուկյանի կենդանիներին կենդանաբանական այգի տեղափոխելու քաղաքապետարանի առաջարկը վերջին երկու օրերի շահարկումների թոփ թեման էր Գլխավոր թեզը գործարարին և քաղաքական ուժի առաջնորդին առնչվող քննչական գործողություններն ու կենդանիների համար այս փուլում, թերևս, ամենահարմար ու անվտանգ հանգրվան ապահովելու առաջարկը փոխկապակցելն ու , որ ամենաանհեթեթն էր, կենդանիներից մեկի անկման ցավալի փաստը որպես քաղաքական հաշվեհարդար մատուցելը:

Այո, ցավալի էր շատ, որ կենդանիներից մեկը, մասնավորապես՝ էգ առյուծը, սեդացիայից հետո չարթնացավ, բայց սա մասնագիտական խոսակցություն է՝ քայլերի ու հնարավոր սխալների տիրույթում, ինչը կարելի էր ենթադրել ու սուբյեկտիվորեն կամ օբյեկտիվորեն վիճարկել, բայց առնվազն դժվար չէր նաև կանխատեսել, որ առյուծի անկման փաստը քաղաքականացվելու էր, վերագրվելու էր դիտավորությանը՝ գեներացնելով դավադրապաշտության մի ամբողջ տեսություն, ինչն արդեն ոչ այնքան սրտացավություն է, որքան մանիպուլյացիա, ցավալի դեպքը արագ փաթեթավորելու և մարդկանց թիրախավորելու գործիք, պարզ դեմոնիզացիա:

Մի կողմ թողնելով մեծաքանակ կենդանիների մասնավոր տարածքներում պահելու իրավունքի վիճելի դրույթը, արձանագրենք մի փաստ՝ իրավական գործընթացով պայմանավորված կենդանիներին պետք էր տեղափոխել մի տարածք, որը միակն է մեր երկրում, որտեղ կարող էին նրանք վերաինտեգրվել և լինել մասնագետների մշտական հոգածության ու խնամքի ներքո, սա էր առաջարկի ու տեղափոխման միակ, ոչ քաղաքական, բացառապես՝ բնապահպանական մղումը»։

Հիշեցնենք, որ Քննչական կոմիտեն գործարար, «Բարգավաճ Հայաստան» կուսակցության նախագահ Գագիկ Ծառուկյանին առնչվող քրեական վարույթի շրջանակներում որոշում էր կայացրել Ծառուկյանի առանձնատնից առգրավել 3 առյուծ, 4 վագր և 9 կոկորդիլոս։ Երևանի քաղաքապետարանի առաջարկով կենդանիներն ի պահ էին տրվել կենդանաբանական այգուն։ Առյուծներին և վագրերին քնեցրել էին ու տեղափոխել կենդանաբանական այգի, սակայն առյուծներից մեկը քնեցումից հետո չէր արթնացել ու անկել էր։