Երևանում կայանալիք COP17-ի քննարկումների կենտրոնում են լինելու նաև կենսաբազմազանության գլոբալ շրջանակի իրականացման խթանման հնարավոր ուղիները
4 րոպեի ընթերցում
Վիեննայի ՄԱԿ-ի գրասենյակում տեղի է ունեցել Վիեննայում ՀՀ մշտական ներկայացուցչության կողմից կազմակերպված բարձրաստիճան ճեպազրույց` նվիրված 2026թ. Երևանում կայանալիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովին: Միջոցառմանը հիմնական ելույթով հանդես է եկել ՀՀ ԱԳ նախարարի տեղակալ Ռոբերտ Աբիսողոմոնյանը:
Ինչպես «Արմենպրես»-ը տեղեկանում է ՀՀ ԱԳՆ-ի տարածած հաղորդագրությունից, Ռոբերտ Աբիսողոմոնյանն իր խոսքում ներկայացրել է Կենսաբազմազանության COP17-ի Հայաստանի նախագահության կողմից իրականացվող ընթացիկ աշխատանքները և նախաձեռնությունները, ինչպես նաև կազմակերպչական մանրամասները:
Ընդգծվել է ՀՀ պատրաստակամությունն ապահովելու ներառական, թափանցիկ և բոլոր շահագրգիռ կողմերի լիարժեք ներգրավվածությամբ համաժողովի անցկացում:
ՀՀ ԱԳ նախարարի տեղակալը նշել է, որ Համաժողովը շրջադարձային է լինելու Կունմին-Մոնրեալի կենսաբազմազանության գլոբալ շրջանակի (KMGBF) իրականացման հարցում գրանցված առաջընթացի առաջին գլոբալ վերանայման, ձեռքբերումների գնահատման, բացերի վերհանման և մարտահրավերների հասցեագրման համար: Ընդգծվել է, որ Համաժողովի շրջանակներում քննարկումների կենտրոնում են լինելու նաև կենսաբազմազանության գլոբալ շրջանակի իրականացման խթանման հնարավոր ուղիները՝ 2030թ. Կայուն զարգացման նպատակներին հասնելու համար:
ԱԳ նախարարի տեղակալ Ռոբերտ Աբիսողոմոնյանը ներկայացրել է Համաժողովին ընդառաջ կայանալիք Առաջնորդների գագաթնաժողովի մանրամասները՝ ընգծելով բարձրագույն մակարդակով կենսաբազմազանության պահպանմանն առնչվող հարցերին ռազմավարական ուղղվածություն և քաղաքական լիցք հաղորդելու կարևորությունը։ Ներկաների ուշադրությունն է հրավիրվել նաև գագաթնաժողովին հաջորդող բարձրաստիճան նախարարական հատվածին, որը կխթանի համաժողովի ընթացքում որոշումների կայացման գործընթացը:
ԱԳ նախարարի տեղակալը կարևորել է Վիեննայում տեղակայված միջազգային կազմակերպությունների ակտիվ ներգրավվածության ապահովումը կենսաբազմազանության օրակարգի խթանման գործում: Այս համատեքստում ընդգծվել է կազմակերպությունների ոլորտային փորձագիտական և մասնագիտական ներուժի լիարժեք կիրարկման կարևորությունը, ինչպես նաև համաժողովին ընդառաջ և դրա շրջանակներում համատեղ միջոցառումների և նախաձեռնությունների իրականացումը:
Ամփոփելով՝ ԱԳ նախարարի տեղակալ Ռոբերտ Աբիսողոմոնյանը նշել է, որ Երևանում անցկացվելիք COP17 համաժողովը միջազգային հանրության համար ծառայելու է որպես կարևոր հարթակ հանձնառություններից դեպի իրականացում անցում կատարելու համար:
Ճեպազրույցին ելույթներով հանդես են եկել Վիեննայում ՀՀ մշտական ներկայացուցիչ Անդրանիկ Հովհաննիսյանը, Ատոմային էներգիայի միջազգային գործակալության (IAEA), ՄԱԿ Թմրամիջոցների և հանցավորության դեմ պայքարի գրասենյակի (UNODC), ՄԱԿ Արդյունաբերության զարգացման կազմակերպության (UNIDO), ինչպես նաև ԵԱՀԿ բարձրաստիճան ներկայացուցիչներ:
Միջոցառմանը ներկա են գտնվել Վիեննայում հավատարմագրված դեսպաններ և մշտական ներկայացուցիչներ, դիվանագետներ, Վիեննայի միջազգային կազմակերպությունների ներկայացուցիչներ:
Ճեպազրույցին հաջորդել է հարցուպատասխան, որի ընթացքում բարձր է գնահատվել ՀՀ ջանքերն արդյունավետ և արդյունքահեն համաժողով կազմակերպելու հարցում: