2 րոպեի ընթերցում
ՀՀ վարչապետ Նիկոլ Փաշինյանի գլխավորությամբ տեղի ունեցած խորհրդակցության ընթացքում քննարկվել են Երևանի մետրոպոլիտենի Աջափնյակ մետրոյի կայարան կառուցման ծրագրի հետագա քայլերը։ «Արմենպրես»-ի հաղորդմամբ՝ վարչապետը նշել է, որ կարևոր է հնարավորինս արագ անցնել նախագծի իրականացման փուլին՝ ընդգծելով, որ գործընթացում որևէ հետաձգում չի եղել։
«Շատ կարևոր եմ համարում, որ Աջափնյակ մետրոյի կայարանի շինարարությունը ի վերջո սկսենք։ Ընդ որում, ուզում եմ ասել, որ ի հեճուկս տպավորությունների՝ ոչ մի հետաձգում չկա»,- ասել է Փաշինյանը։
Նրա խոսքով՝ նախագծի նախապատրաստական աշխատանքները երկար են տևել, քանի որ Հայաստանը շուրջ երեք տասնամյակ նման մասշտաբի մետրոշինարարական նախագիծ չի իրականացրել։
«Պետք է նաև արձանագրել, որ մենք 30 տարի այդ կարգի նախագիծ չենք իրականացրել, և նախագծի համալիր փորձաքննությունն ինքնին բավականին երկար է տևել»,- նշել է վարչապետը։
Փաշինյանի խոսքով՝ այժմ նախագիծն արդեն պատրաստ է իրականացման, և հաջորդ կարևոր խնդիրը համապատասխան մասնագիտական կարողություններ ունեցող գործընկեր ներգրավելն է։
«Հիմա արդեն նախագիծը պատրաստ է իրագործման։ Պետք է վստահ լինենք, որ կա գործընկեր, որն ունի անհրաժեշտ գիտելիքներ, որպեսզի վերահսկի այդ ամբողջ պրոցեսը»,- ասել է նա։
Վարչապետի խոսքով՝ դրանից հետո աշխատանքները կշարունակվեն շինարարության ժամանակացույցի, կապալառու կազմակերպության ընտրության, ինչպես նաև ֆինանսավորման աղբյուրների և մեխանիզմների հստակեցման ուղղությամբ։