Ինդոնեզիայում 7.6 մագնիտուդով երկրաշարժ է գրանցվել

Ինդոնեզիայի Մալուկու ծովի հյուսիսային հատվածում ապրիլի 2-ին տեղի է ունեցել 7.6 մագնիտուդով երկրաշարժ, որի հետևանքով զոհվել է մեկ մարդ, վնասվել են շենքեր։ Ավերիչ ցունամիի վերաբերյալ արված նախնական զգուշացումն ավելի ուշ հանվել է։ Ինչպես հաղորդում է «Արմենպրես»-ը, այս մասին հայտնում է Reuters-ը։

Ինդոնեզիայի օդերևութաբանական գործակալությունը՝ BMKG-ն, հայտնել է ցունամիների մասին հինգ վայրերում։ Դրանցից ամենաբարձրի ալիքը հասել է 0.75 մետրի Հյուսիսային Սուլավեսիի հյուսիսում։

Գրանցվել է մոտ 50 հետցնցում, որոնցից ամենաուժեղը կազմել է 5.8 մագնիտուդ։

Ինդոնեզիայի ազգային աղետների կառավարման գործակալությունը կոչ է արել զգոն լինել։ Մասնավորապես նշվել է, որ իրադրությունը զգոնություն է պահանջում հետցնցումների հնարավորության պատճառով։

Երկրաշարժից աննշանից մինչև միջին չափի վնասներ են կրել մի քանի տներ և եկեղեցի։