Դեսպան Մկրտչյանն ԱՄՆ-ում Նորվեգիայի և Իսլանդիայի դեսպաններին է ներկայացրել Հայաստանի ու Ադրբեջանի միջև խաղաղության գործընթացը

Միացյալ Նահանգներում Հայաստանի Հանրապետության դեսպան Նարեկ Մկրտչյանը հանդիպել է ԱՄՆ-ում Նորվեգիայի դեսպան Աննիկեն Կրուտնեսի, ինչպես նաև ԱՄՆ-ում Իսլանդիայի դեսպան Սվանհիլդուր Օլմ Վալսդոտիրի հետ։

«Արմենպրես»-ի հաղորդմամբ՝ այս մասին հաղորդագրություն է տարածել ԱՄՆ-ում Հայաստանի դեսպանությունը։

Նշվում է, որ հանդիպումների ընթացքում դեսպան Մկրտչյանը անդրադարձել է Հայաստանի և Ադրբեջանի միջև հաստատված խաղաղությանը, գործընկերներին է ներկայացրել ՀՀ-ԱՄՆ երկկողմ օրակարգը։

Հանդիպումներում անդրադարձ է կատարվել նաև ՀՀ-Նորվեգիա և ՀՀ-Իսլանդիա հարաբերությունների հետագա զարգացման հնարավորություններին։