ՀՀ ԱԳ փոխնախարարը հանդիպել է Իտալիայի պատգամավորների պալատի Իտալիա-Հայաստան բարեկամական խմբի հետ

Հայաստանի Հանրապետության արտաքին գործերի նախարարի տեղակալ Վահան Կոստանյանը հանդիպել է Իտալիայի պատգամավորների պալատի Իտալիա-Հայաստան բարեկամական խմբի ղեկավար Ջուլիո Չենտեմերոյի և խմբի անդամ ու ԵԽԽՎ-ում Հայաստանի հարցերով զեկուցող Պիերո Ֆասսինոյի հետ:

«Արմենպրես»-ի փոխանցմամբ՝ ՀՀ ԱԳՆ-ի տարածած հաղորդագրության մեջ ասված է, որ կողմերը գոհունակությամբ նշել են վերջին շրջանում Հայաստանի և Իտալիայի խորհրդարանների միջև շարունակաբար զարգացող արդյունավետ համագործակցությունը: Ընդգծվել է միջխորհրդարանական փոխգործակցության կարևորությունը երկկողմ կապերի զարգացման և ամրապնդման գործում։

Հանդիպման ընթացքում անդրադարձ է կատարվել նաև Հայաստան-ԵՄ գործընկերության ռազմավարարական օրակարգին: Նախարարի տեղակալ Վահան Կոստանյանը զրուցակիցներին է ներկայացրել Հարավային Կովկասում զարգացումները, ինչպես նաև տարածաշրջանում հաստատված խաղաղության պայմաններում Հայաստանի արտաքին քաղաքականության առաջնահերթությունները:

Մտքեր են փոխանակվել տարածաշրջանային փոխկապակցվածության զարգացմանն ուղղված ծրագրերի, այդ թվում նաև՝ «ԹՐԻՓՓ ուղի» նախագծի կյանքի կոչման արդյունքում ակնկալվող նոր հնարավորությունների շուրջ: