2 րոպեի ընթերցում
Հայաստանում հերթական խորհրդարանական ընտրությունները կանցկացվեն 2026թ հունիսի 2-12-ն ընկած միջակայքում, այդ ժամանակահատվածում միակ կիրակին հունիսի 7-ն է:
«Արմենպրես»-ի փոխանցմամբ՝ այս մասին ասուլիսում ասաց Կենտրոնական ընտրական հանձնաժողովի նախագահ Վահագն Հովակիմյանը:
«Սահմանադրության կարգավորումներով ընտրությունների ենթադրվող ժամկետը հաջորդ տարվա հունիսի 2-12 միջակայքն է, ընտրությունները պետք է տեղի ունենան այդ տասնօրյակում»,-ասաց Հովակիմյանը:
Ընտրությունների օրը նշանակում է ՀՀ նախագահը: Նախագահի հրամանագիրը դեռևս չկա: Սակայն ԿԸՀ նախագահը նկատեց, որ բոլորը որպես ընտրությունների օր նկատի են ունենում հունիսի 7-ը:
«Իմ նշած ժամանակահատվածում միակ կիրակին հունիսի 7-ն է: Այսինքն՝ եթե նախագահը որոշի այլ օր՝ աշխատանքային օր նշանակել, ապա ոչ աշխատանքային օր հայտարարելու խնդիր կառաջանա, շղթայական նոր իրավական կարգավորումների անհրաժեշտություն կառաջանա»,-նշեց Հովակիմյանը:
Նրա խոսքով՝ խորհրդարանական ընտրությունների դեպքում ընտրությունները կիրակի օր նշանակելու պահանջ չկա օրենքով, սակայն ընդունված է, բոլորը գիտեն, որ պետք է լինի կիրակի օր: ԿԸՀ նախագահն ընտրությունների պաշտոնական օրն իմանալու համար հորդորեց սպասել ՀՀ նախագահի կողմից ընտրությունների օրվա նշանակմանը:
Հայաստանում խորհրդարանական նախորդ ընտրություններն անցկացվել էին 2021 թվականի հունիսի 20-ին։