Արշակ արքեպիսկոպոս Խաչատրյանը երկու ամսով կալանավորվել է

Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանը երկու ամսով կալանավորվել է։ «Արմենպրես»-ի հաղորդմամբ՝ «Ֆեյսբուք»-ի իր էջում այս մասին գրել է նրա փաստաբան Արսեն Բաբայանը։

Դատարանը դատավոր Մասիս Մելքոնյանի նախագահությամբ բավարարել է քննիչի միջնորդությունը՝ որպես խափանման միջոց ընտրելով կալանքը։

Ավելի վաղ, փաստաբան Բաբայանը հայտնել էր, որ Արշակ արքեպիսկոպոս Խաչատրյանը ձերբակալվել է ԱԱԾ կողմից՝ Քննչական կոմիտեի շենքում։

Փաստաբանը նշել էր, որ Արշակ արքեպիսկոպոս Խաչատրյանը մեղադրվում է այն բանի համար, որ 2018 թվականին կաթողիկոսի դեմ ակցիայի մասնակիցներից մեկի ուսապարկում իր ծառայակիցներից մեկի միջոցով թմրամիջոց է տեղադրել ՝ վերջինիս վարկաբեկելու նպատակով։

Քննչական կոմիտեն իր հերթին հայտնել էր, որ նախաքննության ընթացքում հոգևորականի նկատմամբ հարուցվել է հանրային քրեական հետապնդում՝ Հայաստանի Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական համաձայնությամբ թմրամիջոց ապօրինի իրացնելը՝ հանդիսադիր վայրում)։