Հայաստանն ակնկալում է ԵՄ կոնկրետ ներդրումներն ու մասնակցությունը TRIPP նախագծում․ ՀՀ վարչապետ

Հայաստանն ակնկալում է Եվրամիության կոնկրետ ներդրումային ծրագրերն ու մասնակցությունը «Խաղաղության խաչմերուկ»-ում, այդ թվում՝ TRIPP («Թրամփի ուղի») նախագծում։

Կառավարությունում տեղի ունեցած ճեպազրույցի ժամանակ այս մասին հայտարարեց ՀՀ վարչապետ Նիկոլ Փաշինյանն՝ անդրադառնալով «ՀՀ-ԵՄ գործընկերության ռազմավարական օրակարգ» փաստաթղթով «Խաղաղության խաչմերուկ» նախագծում նախատեսվող ներդրումների վերաբերյալ «Արմենպրես»-ի թղթակցի հարցին։

«ՀՀ-ԵՄ ռազմավարական գործընկերության օրակարգի հաստատումը կարևոր փոփոխություն ու զարգացում է հարաբերություններում: Ինչ վերաբերում է ներդրումներին, ապա վաշինգտոնյան համաձայնություններից հետո և TRIPP նախագծի հայտարարությունից հետո ներդրումային հետաքրքրությունը ՀՀ-ի նկատմամբ էականորեն մեծացել է, և մենք, բնականաբար, շահագրգռված ենք, որ այդ թվում՝ ԵՄ-ն, ենթակառուցվածքային ծրագրերին  ունենա շատ կոնկրետ մասնակցություն ու ներկայություն։ ԵՄ-ի հետ մեր հետագա հարաբերությունները խորանալու են, զարգանալու են, և, իհարկե, «Խաղաղության խաչմերուկ»-ում, այդ թվում՝ TRIPP նախագծի շրջանակներում մենք ակնկալում ենք ԵՄ-ի կոնկրետ ներդրումային ծրագրերն ու մասնակցությունը»,-նշեց Փաշինյանը։  

Նրա խոսքով՝ ԵՄ-ի հետ համագործակցությունը չի սահմանափակվում միայն տարածաշրջանային տրանսպորտային ենթակառուցվածքների ոլորտով, այլ ավելի լայն համատեքստ ունի։

Վարչապետը հիշեցրեց, որ տարիներ առաջ ԵՄ-ն բարձրաձայնել է Հայաստանին 2,6 միլիարդ եվրոյի չափով աջակցություն ցուցաբերելու մասին։ Ըստ Փաշինյանի՝ այդ շրջանակներում արդեն ավելի քան 500 միլիոն եվրո ներդրումներ են կատարվել, այդ թվում՝ բանկային համակարգի միջոցով մասնավոր հատվածի վարկավորմամբ։