Վահան Կոստանյանը Նիկոսիայում հանդիպել է Կիպրոսի հարցով հույն-կիպրական կողմի բանակցողի հետ
1 րոպեի ընթերցում
Հայաստանի արտաքին գործերի նախարարի տեղակալ Վահան Կոստանյանը Նիկոսիայում նոյեմբերի 24-ին հանդիպել է Կիպրոսի հարցով հույն-կիպրական կողմի բանակցող Մենելաոս Մենելաուի հետ։
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ արտաքին գործերի նախարարությունը։
Քննարկման ընթացքում կողմերը մտքեր են փոխանակել Կիպրոսի հարցին առնչվող վերջին զարգացումների, այդ թվում՝ բանակցությունների ներկայիս վիճակի և դրանց հետագա առաջխաղացման հեռանկարների վերաբերյալ։ Պաշտոնյաները երկուստեք վերահաստատել են, որ համապարփակ և արդար կարգավորումը շարունակում է կարևոր մնալ տարածաշրջանային երկարաժամկետ կայունության համար։
Անդրադարձ է կատարվել օգոստոսի 8-ին Վաշինգտոնում Հայաստանի և Ադրբեջանի միջև ձեռք բերված պայմանավորվածություններին, ինչպես նաև Հայաստան-Թուրքիա հարաբերությունների կարգավորման գործընթացին։
Երկու կողմերն էլ ընդգծել են Հայաստանի և Կիպրոսի միջև հարաբերությունների սերտ համակարգման և կանոնավոր քաղաքական երկխոսության պահպանման կարևորությունը։ Նշվել է, որ երկու երկրների միջև երկարամյա գործընկերությունը ամուր հիմք է ծառայում տարածաշրջանային և միջազգային հարցերում համագործակցության ընդլայնման համար։