Հայաստանի և Մոնակոյի հարաբերությունները հիմնված են ընդհանուր արժեքների և վստահության վրա․ դեսպան Խաչատրյան
1 րոպեի ընթերցում
Ֆրանսիայում Հայաստանի Հանրապետության դեսպանության բարձր հովանու ներքո Մոնակոյի Աստվածամոր տաճարում տեղի է ունեցել համերգ՝ նվիրված ՀՀ անկախության 34-րդ տարեդարձին։
«Արմենպրես»-ի հաղորդմամբ՝ այս մասին ասված է Ֆրանսիայում ՀՀ դեսպանության տարածած հաղորդագրության մեջ։
Նշվում է, որ մշակութային երեկոն միավորել է երաժշտասերներին Մոնակոյում՝ ներկայացնելով հայկական և համաշխարհային դասական երաժշտության լավագույն ստեղծագործություններից։
«Շնորհավորելով Հայաստանի Հանրապետության անկախության տարեդարձի առթիվ` Ֆրանսիայում և Մոնակոյում ՀՀ դեսպան Արման Խաչատրյանն իր բացման խոսքում ընդգծել է, որ Հայաստանի և Մոնակոյի միջև հարաբերությունները հիմնված են ընդհանուր արժեքների և վստահության վրա, իսկ այս համերգը երկու երկրների միջև բարեկամական կապերի գեղեցիկ դրսևորում է»,-նշված է դեսպանության տարածած հաղորդագրության մեջ։
Միջոցառմանը ներկա են գտնվել նաև Մոնակոյի արտաքին գործերի և համագործակցության հարցերով նախարարության ներկայացուցիչներ, Ազգային խորհրդի անդամներ, մշակութային և հասարակական գործիչներ, ինչպես նաև հայկական համայնքի ներկայացուցիչներ։