Հայաստանն ակնկալում է ԵՄ-ի հետ վիզաների ազատականացման գործողությունների ծրագիրը ստանալ սեպտեմբերի վերջին
2 րոպեի ընթերցում
Հայաստանն ակնկալում է սեպտեմբերի ավարտին արդեն եվրոպական կողմից ստանալ Հայաստան–ԵՄ վիզաների ազատականացման գործողությունների ծրագրի վերջնական տեքստը:
«Արմենպրես»–ի փոխանցմամբ՝ լրագրողների հետ զրույցում այս մասին հայտնեց Ներքին գործերի նախարար Արփինե Սարգսյանը:
«Գրեթե ավարտական փուլում ենք գտնվում գործողությունների ծրագրի ստացման մասով: Բավականին երկար աշխատել ենք գործընկերների հետ, հայտարարել ենք երկխոսության մեկնարկի մասին: Ընդ որում, սա բացառիկ էր եվրոպական տարածաշրջանում, որովհետև հատկապես վերջին տարիներին ԵՄ–ն երկխոսություն գրեթե չի սկսում: Եվ Հայաստանն այս դեպքում բացառություն է համարվել: Արդեն իսկ մի քանի առաքելություններ են ժամանել Հայաստան: Աշնանը սպասում ենք գործողությունների ծրագրի վերջնական տեքստի փոխանցմանը հայկական կողմին»,–ասաց Սարգսյանը:
Որպես թեմայով հայաստանյան կողմից գլխավոր բանակցող՝ Արփինե Սարգսյանն աշխատում է ԵՄ գործընկերների հետ, որ Հայաստանը հնարավորինս շուտ ստանա տեքստը: Նա նկատեց՝ դրանով իսկ գնդակը կհայտնվի հայկական կողմի դաշտում:
«Նախնական տրամաբանությամբ սեպտեմբերի ավարտին կստանանք գործողությունների ծրագիրը: Հետո արդեն կլծվենք աշխատանքին բոլոր միջոցառումները կատարելու ուղղությամբ»,–նշեց նախարարը՝ հավելելով, որ այդ առումով միայն ՆԳՆ–ն չէ, որ անելիքներ ունի:
Սարգսյանը նաև հայտնեց, որ կենսաչափական նոր համակարգը նախատեսվում է, որ կգործի արդեն 2026–ի երկրորդ կիսամյակին: Այս պահին թե անձնագրի, թե նույնականացման քարտի դիզայնի վերջնականացման ուղղությամբ աշխատանքներ են տարվում: