2 րոպեի ընթերցում
ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանը Հաագայում ընթացող ՆԱՏՕ-ի գագաթնաժողովի շրջանակներում հանդիպել է ԱՄՆ նախագահ Դոնալդ Թրամփի հետ։
Ինչպես հաղորդում է «Արմենպրես»-ը, այս մասին հայտնում է «Անադոլու» գործակալությունը:
Նախագահների միջև բանակցությունները տեղի են ունեցել մամուլի համար փակ ռեժիմով:
Հանդիպման ընթացքում առաջնորդները քննարկել են Թուրքիայի և Միացյալ Նահանգների միջև երկկողմ հարաբերությունները, տարածաշրջանային և գլոբալ հարցեր։
Հանդիպման ժամանակ Էրդողանը նշել է, որ երկու երկրները համագործակցության մեծ ներուժ ունեն տարբեր ոլորտներում, մասնավորապես էներգետիկայի և ներդրումների ոլորտում։
Թուրքիայի նախագահի խոսքով՝ համագործակցության զարգացումը, մասնավորապես պաշտպանական արդյունաբերության ոլորտում, կնպաստի 100 միլիարդ դոլարի ընդհանուր առևտրային ծավալի նպատակին հասնելուն։
Էրդողանը ողջունել է Իսրայելի և Իրանի միջև Թրամփի ջանքերի շնորհիվ ձեռք բերված հրադադարը։ Նա մաղթել է, որ Իսրայելի և Իրանի միջև հրադադարը մշտական լինի և ընդգծել է սերտ երկխոսության կարևորությունը՝ Գազայում մարդասիրական ողբերգության արագ ավարտի և Ռուսաստանի ու Ուկրաինայի միջև հակամարտության խաղաղ կարգավորման համար։