Նիկոլ Փաշինյանը հայտնել է, թե ինչու է որոշել Արմեն Աբազյանին ազատել ԱԱԾ տնօրենի պաշտոնից
2 րոպեի ընթերցում
Հայաստանի վարչապետ Նիկոլ Փաշինյանը խոսել է Արմեն Աբազյանին ՀՀ ազգային անվտանգության տնօրենի պաշտոնից ազատելու պատճառի մասին։
«Արմենպրես»-ի փոխանցմամբ՝ խորհրդարանում լրագրողների հետ ճեպազրույցում Փաշինյանն ասել է, որ Արմեն Աբազյանը իր վարչապետության օրոք ամենաերկարն է եղել ԱԱԾ տնօրենի պաշտոնում և աշխատել է ամենաբարդ շրջանում։ «Նրա պաշտոնավարման ողջ ընթացքը եղել է չափազանց բարդ, և ես կարծում եմ, որ նա արժանացել է, որ մի փոքր հանգստանա, որովհետև 5 տարի լարված պայմաններում աշխատելը Ազգային անվտանգության ծառայության տնօրենի պաշտոնում, կարծում եմ, հասկանում եք, որ հեշտ չէ»,- նշել է Փաշինյանը։
Անդրադառնալով հարցին, թե արդյոք Արմեն Աբազյանին ԱԱԾ տնօրենի պաշտոնից ազատելու որոշումը կապ ունի գործարար Սամվել Կարապետյանի տանը իրականացված գործողությունների հետ՝ Փաշինյանն ասել է. «Գիտեք, Ձեր նշած հանգամանքների հետ ուղղակի կապ ունեն իմ նշած հանգամանքները, իսկ ընդհանրապես ԱԱԾ տնօրենի աշխատանքն առնչվում է գրեթե ամեն ինչի հետ, հատկապես նրա հետ, ինչ վերաբերվում է անվտանգությանը, այդ թվում՝ հիբրիդային անվտանգությանը»։
Հարցին, թե Արմեն Աբազյանը հրաժարվե՞լ է որևէ հանձնարարություն կատարել, Փաշինյանն ասել է, որ չէր կարող ԱԱԾ տնօրենը հրաժարվել իր որևէ հանձնարարություն կատարելուց։
Վարչապետ Նիկոլ Փաշինյանի որոշմամբ՝ Արմեն Աբազյանը հունիսի 18-ին ազատվել է ԱԱԾ տնօրենի պաշտոնից։ ԱԱԾ տնօրենի պարտականությունների կատարումը ժամանակավորապես վերապահվել է ԱԱԾ տնօրենի տեղակալ Անդրանիկ Սիմոնյանին։