Սևանի թիվ 1 հիմնական և Վաղաշենի միջնակարգ դպրոցների թիմերը՝ «ՀՀ վարչապետի գավաթ» հեծանվավազքի մրցաշարի մարզային փուլի հաղթողներ
2 րոպեի ընթերցում
2025 թվականի մայիսի 30-ին Գեղարքունիքի մարզի համայնքային փուլի հաղթող դպրոցական թիմերը մասնակցել են «ՀՀ վարչապետի գավաթ» խճուղային հեծանվավազքի սիրողական մրցաշարի մարզային փուլին, որը կայացել է մարզի Շողակաթ-Ծովագյուղ ավտոմայրուղու 30 կմ հատվածում։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, մրցումներին ներկա են եղել մարզպետի տեղակալ Ջանիկ Բազեյանը և ՀՀ ԿԳՄՍ նախարարի խորհրդական Արման Անտոնյանը։
Հեծանվորդների անվտանգությունն ապահովել են ՀՀ ՆԳՆ պարեկային ծառայության Գեղարքունիքի մարզի գումարտակի պարեկները, իսկ առաջին բուժօգնությունը՝ Ճամբարակի առողջության կենտրոնի շտապօգնության բրիգադը։
Առաջին տարիքային խմբում (7-9-րդ դասարանցիներ) առաջատարը եղել է Սևանի Մեսրոպ Մաշտոցի անվան N 1 դպրոցի թիմը, այնուհետև երկրորդ հորիզոնականում՝ Սևանի N 4 հիմնական, իսկ երրորդ հորիզոնականում՝ Գետիկի միջնակարգ դպրոցների թիմերը։
Երկրորդ տարիքային խմբում (10-12-րդ դասարանցիներ) լավագույն արդյունքը ցուցաբերել է Վաղաշենի միջնակարգ դպրոցի թիմը։ Երկրորդ տեղը գրավել է Լճավանի, իսկ երրորդ տեղը՝ Ծովազարդի միջնակարգ դպրոցների թիմերը։
Երկու տարիքային խմբերում մրցանակային տեղեր գրաված թիմերին ՀՀ ԿԳՄՍ նախարարության կողմից հանձնվել են գավաթներ և հավաստագրեր։
Մարզային մրցաշարում, ըստ տարիքային խմբերի, առաջին տեղ գրաված թիմերը սեպտեմբերին կմասնակցեն «ՀՀ վարչապետի գավաթ» խճուղային հեծանվավազքի սիրողական մրցաշարի եզրափակիչ փուլի մրցումներին։