Ռուսաստանը քննարկում է Կենտրոնական Աֆրիկայի Հանրապետությունում ռազմաբազայի ստեղծումը

Կենտրոնական Աֆրիկայի Հանրապետությունում (ԿԱՀ) ՌԴ ռազմաբազայի ստեղծումը մշակվում է երկու երկրների պաշտպանության նախարարությունների կողմից: «Արմենպրես»-ի փոխանցմամբ՝ այս մասին «Իզվեստիա» թերթին ասել է ԿԱՀ-ում Ռուսաստանի դեսպան Ալեքսանդր Բիկանտովը։

«ԿԱՀ-ում ռազմական բազա ստեղծելու հարցը մշակվում է երկու երկրների պաշտպանության նախարարությունների կողմից։ Քննարկվում են նախագծի իրականացման փոխընդունելի պայմանները։ Մենք հույս ունենք, որ ապագայում կողմերը կկարողանան հասնել անհրաժեշտ համաձայնությունների», - ասել է Բիկանտովը։

«Իզվեստիա»-ի հետ զրույցում դիվանագետը նշել է, որ Մոսկվան պատրաստ է աջակցել աֆրիկյան հանրապետության ադամանդագործության ոլորտի զարգացմանը։ ԿԱՀ-ում պահանջված է նաև Ռուսաստանի մարդասիրական օգնությունը։ Միայն 2025 թ. սկզբից ի վեր Ռուսաստանի Դաշնությունը հանրապետությանը մատակարարել է 29 400 տոննա դիզելային վառելիք, իսկ 2024 թվականին՝ 50 000 տոննա ցորեն։