2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ Հռոմի Ֆրանցիսկոս պապի հուղարկավորության համար Վատիկան իր այցի ընթացքում հանդիպումներ կունենա աշխարհի մի շարք ղեկավարների հետ։ «Արմենպրես»-ի փոխանցմամբ՝ այս մասին նա հայտնել է Օվալաձև աշխատասենյակում լրագրողների հետ զրույցում, որի տեսանյութը տարածել է Forbes Breaking News-ը:
«Ես շատ հանդիպումներ ունեմ նշանակված։ Չգիտեմ՝ արդյոք կարող եմ դա անել.... Ես բազմաթիվ հանդիպումներ ունեմ, աշխարհի բոլոր ղեկավարները (խմբ.՝ ցանկանում են), ինչը խոսում է այն մասին, որ մենք լավ ապրանք ունենք, որը կոչվում է Ամերիկայի Միացյալ Նահանգներ», - ասել է Թրամփը։
Լրագրողները նաև հարցրել են՝ արդյոք նա Վատիկանում կհանդիպի Ուկրաինայի նախագահ Վոլոդիմիր Զելենսկիի հետ։ Թրամփը պատասխանել է, որ չգիտի՝ արդյոք Զելենսկին լինելու է հուղարկավորությանը։
Դոնալդ Թրամփը Վատիկան է մեկնելու ԱՄՆ առաջին տիկին Մելանյա Թրամփի հետ։ Սա երկրորդ նախագահության ընթացքում Թրամփի առաջին օտարերկրյա այցը կլինի։
Հռոմի պապի հուղարկավորությանն ակնկալվում է աշխարհի տարբեր ղեկավարների ներկայությունը, այդ թվում՝ Ֆրանսիայի նախագահ Էմանուել Մակրոնի, Եվրոպական հանձնաժողովի նախագահ Ուրսուլա ֆոն դեր Լայենի, Գերմանիայի նախագահ Ֆրանկ-Վալտեր Շտայնմայերի և կանցլեր Օլաֆ Շոլցի, Ուկրաինայի նախագահ Վոլոդիմիր Զելենսկիի, Արգենտինայի նախագահ Խավիեր Միլեյի, Բրազիլիայի նախագահ Լուիս Ինասիո Լուլա դա Սիլվայի։
Գարեգին Բ Ամենայն Հայոց Կաթողիկոսը նույնպես մասնակցելու է Հռոմի Ֆրանցիսկոս պապի հուղարկավորության արարողությանը, որը կկայանա ապրիլի 26-ին։
Հռոմի Ֆրանցիսկոս պապը վախճանվել է ապրիլի 21-ին, կաթվածից, 88 տարեկանում։