1 րոպեի ընթերցում
Մյանմայում մարտի 28-ին տեղի ունեցած ավերիչ երկրաշարժի զոհերի թիվը հասել է 3085-ի, իսկ վիրավորներինը` 4715-ի։ 341 մարդ անհետ կորած է։ «Արմենպրես»-ի փոխանցմամբ՝ այս մասին հաղորդում է The Associated Press-ը։
7,7 մագնիտուդով երկրաշարժի էպիկենտրոնը Մյանմայի՝ մեծությամբ երկրորդ Մանդալայ քաղաքի մոտ էր։ Այնտեղ փլուզվել են հազարավոր շենքեր, ավերվել կամուրջներ ու ճանապարհներ։
Ցնցումները զգացվել են նաև հարևան Թաիլանդում, ինչպես նաև Չինաստանում, Կամբոջայում, Բանգլադեշում և Հնդկաստանում։
Ըստ The National պարբերականի՝ Բանգկոկում փրկարարները Գլխավոր աուդիտորական գրասենյակի 30-հարկանի փլուզված շենքի փլատակներում հայտնաբերել են ևս 14 դի, որից հետո զոհերի թիվը հասել է 29-ի։ Այլ լրատվամիջոցներ հաղորդում են, որ Թաիլանդում ընդհանուր զոհերի թիվը հասել է 36-ի։ Եվս 9 մարդ վիրավորվել են, իսկ 59-ը անհետ կորած են։
Բանգկոկի քաղաքապետ Չաթչաթ Սիտիպհանը հայտնել է, որ հայտնաբերված 14 դիերից միայն մեկն է դուրս բերվել փլատակներից: Ակնկալվում է, որ մնացած զոհերի մարմինները փլատակներից դուրս կբերվեն այսօր՝ ապրիլի 3-ին։
Նրա խոսքով՝ այժմ փրկարարները փորձում են հասնել վերելակի հորան, որտեղ կարող են գտնվել ողջ մնացած աշխատակիցներ։