Խաղաղության համաձայնագրի համաձայնեցված տեքստում չկա սահմանադրությունների մասին կարգավորում. Միրզոյան
2 րոպեի ընթերցում
Հայաստանի և Ադրբեջանի միջև խաղաղության համաձայնագրի նախագծի համաձայնեցված տեքստում չկա որևէ միակողմանի կարգավորում, չկա նաև երկու երկրների սահմանադրությունների մասին կարգավորում:
«Արմենպրես»-ի հաղորդմամբ` ԱԺ արտաքին հարաբերությունների նիստում այս մասին վստահեցրեց ՀՀ արտաքին գործերի նախարար Արարատ Միրզոյանը:
«Լսեցին ադրբեջանական կողմից մեկնաբանությունը Հայաստանի Հանրապետության Սահմանադրության մասին: Այս մասին, իհարկե, բնականաբար համաձայնագրի համաձայնեցված տեքստում կրկին ոչինչ չկա: Ընդհանրապես, համաձայնագրի տեքստում որևէ միակողմանի կարգավորում չկա: Չկա նաև սահմանադրությունների մասին կարգավորում»,-ասաց Միրզոյանը:
ԱԳ նախարարը հիշեցրեց՝ հայկական կողմը ևս մտահոգություններ ունի Ադրբեջանի Սահմանադրության մասին: Հայտնի է, որ Հայաստանն այնտեղ տեսնում է որոշակի նկրտումներ՝ ՀՀ տարածքային ամբողջականության նկատմամբ:
«Բայց նաև հայտնի է, որ մենք կարծում ենք, որ համաձայնագրի տեքստում ունենք որոշակի դրույթներ, որոնք փարատում են: Եթե նույնիսկ տեսականորեն իսկապես սահմանադրություններում կարող են լինել այդպիսի պահանջներ, ապա մենք համաձայնագրի տեքստի ստորագրմամբ և վավերացմամբ մեկընդմիշտ այդ հարցերը կարող ենք համարել փակված»,-ասաց ԱԳ նախարարը:
Նրա խոսքով՝ համաձայնագրի վավերացումը պետք է անցնի Հայաստանի Սահմանադրական դատարանով: