ԵԽ լիտվացի պատգամավորը հայտարարել է, որ Ադրբեջանում պահվող հայ գերիները պետք է անհապաղ ազատ արձակվեն
2 րոպեի ընթերցում
Եվրոպական խորհրդարանի լիտվացի պատգամավոր Վիտյանիս Անդրյուկայտիսը Լեռնային Ղարաբաղում Ադրբեջանի իրականացրած գործողությունները որակել է որպես էթնիկ զտում և ռազմական հանցագործություն՝ կոչ անելով պատժամիջոցներ կիրառել Բաքվի դեմ։
«Արմենպրես»-ի փոխանցմամբ՝ լիտվացի պատգամավորը նման հայտարարություն է արել Եվրախորհրդարանում հայ գերիների վերաբերյալ հրատապ բանաձևի քննարկման ժամանակ։
«Ադրբեջանի ռազմական գործողությունների արդյունքում Լեռնային Ղարաբաղը ենթարկվել է էթնիկ զտման։ Ադրբեջանն էթնիկ զտումներ է իրականացրել, և դա ռազմական հանցագործություն է»,-ընդգծել է պատգամավորը։
Նա մատնանշել է, որ Ադրբեջանը միջազգային պարտավորություններ ունի, սակայն դրանք չի կատարում, ինչի համար պետք է պատժամիջոցների ենթարկվի։
«Կա Մարդու իրավունքների համընդհանուր հռչակագիր և կան այլ միջազգային իրավական պարտավորություններ, ուստի Ադրբեջանը պետք է ենթարկվի պատժամիջոցների դրանք չկատարելու համար»,-նշել է Վիտյանիս Անդրյուկայտիսը։
Նրա հայտարարել է, որ Ադրբեջանում պահվող հայերի պահման պայմանները սարսափելի են, և նրանց առողջությունը վտանգված է։
«Մենք պետք է բոլոր հնարավոր ջանքերը գործադրենք լուծում գտնելու համար։ Քաղբանտարկյալները պետք է հնարավորինս արագ ազատ արձակվեն։
Ադրբեջանը չի ցանկանում վերջ դնել այս հակամարտությանը և չի ցանկանում արձագանքել միջազգային հանրության պահանջներին»,-ասել է պատգամավորը։