«Զորավար Անդրանիկ» կայարանի շարժասանդուղքների փոխարինման գործընթացի համար հայտարարվել է 504 միլիոն դրամի մրցույթ
1 րոպեի ընթերցում
Կարեն Դեմիրճյանի անվան Երևանի մետրոպոլիտենը փուլ առ փուլ արդիականացվում է՝ ուղևորների համար առավել հարմարավետ դառնալով: «Արմենպրես»-ի փոխանցմամբ՝ այս մասին հայտնում են Երևանի քաղաքապետարանից՝ ընդգծելով, որ վերջին երկու տարվա ընթացքում Երևանի մետրոպոլիտենի արդիականացման և վերազինման նպատակով կատարվել է 6 միլիարդ 300 միլիոն դրամի ներդրում:
Արդեն մեկնարկել է «Զորավար Անդրանիկ» կայարանի շարժասանդուղքների փոխարինման գործընթացը, որի համար հայտարարվել է 504 միլիոն դրամի մրցույթ:
««Հանրապետության հրապարակ» կայարանի շարժասանդուղքների հիմնանորոգման համար ծախսվել է 260 միլիոն դրամ։
«Գործարանային» կայարանի շարժասանդուղքներն ամբողջությամբ փոխարինվել են, որի համար հատկացվել է 204 միլիոն դրամ։
«Սասունցի Դավիթ» կայարանի շարժասանդուղքների փոխարինումը դեռ ընթանում է, ներդրումը կազմում է 114 միլիոն դրամ»,- նշված է քաղաքապետարանի տարածած հաղորդագրության մեջ: