Երևանում նշվեց Հայրենական Մեծ պատերազմում բլոկադայի ենթարկված Լենինգրադի ազատագրման հերթական տարեդարձը

Երևանի Վահագն Դավթյանի անվան այգում, պաշարված Լենինգրադի երեխաների հուշարձանի մոտ տեղի ունեցավ ֆաշիստական շրջափակումից քաղաքի ամբողջական ազատագրման 81-րդ տարեդարձը։ Պաշարված Լենինգրադի երեխաների հուշարձանին դրվեցին ծաղիկներ ու ծաղկեպսակներ՝ որպես հարգանքի տուրք ողբերգական իրադարձությունների զոհերի հիշատակին։ Արարողությանը ներկա էին ՀՀ-ում ՌԴ դեսպանատան և ՀԿ-ների ներկայացուցիչներ։  

«Արմենպրես»-ի հաղորդմամբ՝ ՀՀ-ում ՌԴ արտակարգ և լիազոր դեսպան Սերգեյ Կոպիրկինն իր ելույթում նշեց, որ ավանդույթի համաձայն Երևանում նշվում է Լենինգրադի ազատագրման և ահավոր բլոկադայի հերթական տարելիցը։ 

«Բոլորս գիտենք լենինգրադցիների մեծագույն հերոսության, տառապանքների և հոգու արիության մասին, որոնց շնորհիվ պաշարված Լենինգրադի բնակիչները՝ զինվորականներն ու խաղաղ բնակիչները, կարողացան վերապրել ահավոր փորձությունը, սովը, ռմբակոծություններն ու դիմանալ այդ ամենին։ Դա օրինակ է, որը ոգեշնչել է, ոգեշնչում է և դեռ ապագայում էլ կոգեշնչի գալիք սերունդներին։ Դա անսահման տոկունության և հայրենասիրության օրինակ է»,- ասաց Կոպիրկինը։ 

Նա հավելեց, որ ավանդույթի համաձայն՝ ամեն տարի բլոկադայի ենթարկված Լենինգրադի երեխաներին նվիրված հուշարձանի մոտ անցկացվում է կարևոր միջոցառում, ինչն, ըստ էության, այն որակների վառ արտահայտությունն է, որոնք բնորոշ են հայ-ռուսական հարաբերություններին։

«Հատկապես եղբայրությունը, փոխօգնությունը, փոխաջակցությունն ու հոգևոր-մշակութային արժեքներն այն գործոններն են, որոնք մեզ միշտ միավորել են և թույլ տվել Խորհրդային Միության բոլոր ժողովուրդներին հաղթել ահավոր պատերազմում։ Այդ գործոնները թույլ են տալիս նաև հաղթահարել այն փորձություններն ու մարտահրավերները, որոնք մեզ բերում է ժամանակակից բարդ աշխարհը։ Այս հուշարձանը Երևանի քաղաքապետի և Սանկտ-Պետերբուրգի նահանգապետի համատեղ նախաձեռնությամբ բացվել է տասը տարի առաջ, ինչը նույնպես խորհրդանշական տարեդարձ է։ Ամեն տարի գալիս ենք այստեղ և հարգանքի տուրք մատուցում հումանիզմի ու մարդասիրության մեծագույն դրսևորմանը, որ ցուցաբերել է հայ ժողովուրդը բլոկադայի ենթարկված Լենինգրադի երեխաներին»,- նշեց դիվանագետը։

Կոպիրկինը վստահեցրեց, որ ռուս ժողովուրդը երբեք չի մոռանա այդ աջակցության մասին։ Ըստ նրա՝ ընթացիկ տարին լինելու է բացառիկ, որովհետև տվյալ միջոցառումը բացում է մի շարք նախաձեռնությունների շղթա, որոնք նվիրված են լինելու Հայրենական Մեծ պատերազմում և Երկրորդ աշխարհամարտում տարած հաղթանակի 80-ամյա հոբելյանին։ Նա հույս հայտնեց, որ ՀՀ իշխանությունները նույնպես կմասնակցեն հանդիսություններին։ 

«Ցավոք, այսօր սրությամբ դրված է պատմական հիշողության պահպանության հարցը, որի հանդեպ տեղի են ունենում ոտնձգություններ տարբեր կողմերից։ Դրանք կապված են կոնյուկտուրային, նեղ անձնական շահերի հետ, որոնք, ցավոք, բավականին ուժեղ են ժամանակակից աշխարհում։ Այսօր փորձ է արվում ոչ միայն կեղծել պատմությունը, այլև այն խլել մեզանից, հետևաբար մեր ժողովուրդների բարոյական խնդիրն է պաշտպանել ճշմարտությունը։ Ներկա միջոցառումը դրա լավագույն առհավատչյան է»,- եզրափակեց Կոպիրկինը։ 

«Россотрудничество» կազմակերպության ղեկավար Վադիմ Ֆիֆիլովն իր հերթին ընթերցեց ՌԴ Սանկտ-Պետերբուրգի նահանգապետ Ալեքսանդր Բեգլովի ուղերձը՝ ուղղված Հայրենական Մեծ պատերազմի վետերաններին, բլոկադայի ենթարկված Լենինգրադի պաշտպանության մասնակիցներին և բնակիչներին, որոնք այսօր ապրում են արտերկրում։ 

«Լենինգրադի ազատագրման 81-րդ տարեդարձը մեր Հայրենիքի համար լուսավոր իրադարձություն է։ Անպարտելի քաղաքն իր պաշտպանների ու բնակիչների արիության և տոկունության շնորհիվ համաշխարհային պատմության մեջ գրեց ամենահերոսական էջերից մեկը։ Ձեր անօրինակ սխրանքն ապացուցեց, որ հնարավոր չէ ծնկի բերել կամ հաղթել մեր բազմազգ երկրին։ Ֆաշիզմի նկատմամբ մեր երկրի տարած հաղթանակի 80-ամյակի առթիվ իմ և պետերբուրգցիների անունից ընդունեք երախտիքի խոսքեր՝ Հայրենիքի ազատության և անկախության համար, ինչպես նաև աշխարհի գեղեցկագույն քաղաքներից մեկի պահպանումը գալիք սերունդների համար»,- ասված է ուղերձում։  

Վերջում Հայ Առաքելական եկեղեցու հոգևոր ներկայացուցիչն անցկացրեց Լենինգրադի բլոկադայի նահատակների հիշատակին նվիրված ծիսակատարություն։