1 րոպեի ընթերցում
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Հայաստանում 2026 թվականին կայանալիք ՄԱԿ-ի Կենսաբազմազանության կողմերի 17-րդ համաժողովի (COP-17) կազմակերպչական աշխատանքներն արդեն մեկնարկել են:
«Արմենպրես»-ի փոխանցմամբ՝ այս մասին 2024 թվականի աշխատանքներն ամփոփող ասուլիսի ժամանակ հայտնեց ՀՀ շրջակա միջավայրի նախարար Հակոբ Սիմիդյանը:
«Հայաստանը 2026 թվականին կընդունի ՄԱԿ-ի Կենսաբազմազանության կողմերի 17-րդ համաժողովը (COP-17) : Այն բավականին խոշոր և կարևոր բնապահպանական միջոցառում է, կազմակերպչական աշխատանքներն արդեն մեկնարկել են, ստեղծվել է կոմիտե, որը ղեկավարում է ՀՀ վարչապետի գլխավոր խորհրդական Համբարձում Մաթևոսյանը»,- ասաց Սիմիդյանը:
Հայաստանը 2026 թվականին հյուրընկալելու է Կենսաբազմազանության կողմերի համաժողովը՝ COP-17-ը: 2024 թվականի հոկտեմբերի 31-ին COP-16-ի ավարտին կայացած քվեարկության արդյունքներով Հայաստանն առաջ է անցել Ադրբեջանից։ Հայաստանը հավաքել է 65, Ադրբեջանը՝ 58 ձայն։