2 րոպեի ընթերցում
ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ։ Ջերմուկ համայնքի Գնդևազ գյուղում գտնվող գույքը նվիրաբերվեց պաշտպանության նախարարությանը։
«Արմենպրես»-ի հաղորդմամբ՝ նախագիծը ներառված էր ՀՀ կառավարության դեկտեմբերի 19-ի նիստի չզեկուցվող հարցերի փաթեթում։
Գույքը նվիրաբերվում է «Գունդ» ՍՊ ընկերության կողմից, և այն նախատեսվում է օգտագործել ՀՀ զինված ուժերի կարիքների համար։
Հիմք ընդունելով կադաստրի տրամադրած տվյալները՝ նշված գույքի հետ առկա են մի շարք խնդիրներ։ Մասնավորապես, հողամասի փաստացի մակերեսը չի համապատասխանում գրանցված տվյալներին։ Կադաստրային քարտեզում արտացոլված որոշ շինություններ իրականում գոյություն չունեն, իսկ առկա շինություններից մի քանիսը չեն արտացոլված քարտեզում։ Բացի այդ, հարակից հողամասերի հետ առկա են սահմանների անհամապատասխանություններ։
Հաշվի առնելով գույքի նվիրատվության հրատապությունը՝ որոշվել է այս գործընթացն իրականացնել Պաշտպանության նախարարության կողմից՝ հետագա ճշգրտումներով և պետական գրանցմամբ։
Նախագծի ընդունման դեպքում նախատեսվում է գույքի վերազինման և անհրաժեշտ ենթակառուցվածքների կառուցման համար հատկացնել 2548.7 մլն դրամ։ Այս գումարը կիրականացվի երկու փուլով․առաջին փուլում՝ 251.2 մլն դրամ, երկրորդ փուլում՝ 2297.5 մլն դրամ։
Աշխատանքները ֆինանսավորվելու են Պաշտպանության նախարարության հաջորդ տարիների կապիտալ շինարարության ծրագրերի շրջանակներում պետական բյուջեի հատկացումներով։