Քամալա Հարիսը մտադիր է զանգահարել Թրամփին և ընդունել ընտրություններում իր պարտությունը
1 րոպեի ընթերցում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: ԱՄՆ-ի փոխնախագահ, ավարտված ընտրություններում նախագահի թեկնածու Քամալա Հարիսն, ամենայն հավանականությամբ, առաջիկա ժամերին կզանգահարի իր մրցակից Դոնալդ Թրամփին և կհայտնի ընտրություններում պարտությունն ընդունելու մասին: «Արմենպրես»-ի հաղորդմամբ՝ այդ մասին հայտնում է NBC-ն՝ վկայակոչելով Հարրիսի երկու օգնականներին:
Նշվում է, որ հեռախոսազանգի ժամը դեռ չի հստակեցվել, քանի որ Հարիսն աշխատում է իր ելույթի վրա:
Միևնույն ժամանակ, Սպիտակ տան ներկայացուցիչը նշված հեռուստաընկերությանը հայտնել է, որ ԱՄՆ-ի առայժմ գործող նախագահ Ջո Բայդենը նույնպես մտադիր է մոտակա ժամերին զանգահարել Թրամփին և, բացի այդ, հրապարակայնորեն խոսել ընտրությունների արդյունքների մասին։
Սպիտակ տանը պարզաբանել են, որ Բայդենը, ի տարբերություն 2020 թվականի ընտրություններից հետո Թրամփի դրսևորած վարքագծի, մտադիր է զանգահարել և շնորհավորել վերջինիս, նրան հրավիրել Սպիտակ տուն և մասնակցել հունվարի 20-ին նախատեսված երդմնակալության արարողությանը։