Հայաստանը կմասնակցի Ֆրանսիայում կայանալիք «𝐒𝐢𝐚𝐥 𝟐𝟎𝟐𝟒» միջազգային ցուցահանդեսին` ներկայացնելով 23 հայկական ընկերության արտադրանք
1 րոպեի ընթերցում
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետությունը հոկտեմբերի 19-23-ը կմասնակցի Ֆրանսիայի մայրաքաղաքում կայանալիք «𝐒𝐢𝐚𝐥 𝟐𝟎𝟐𝟒» սննդի և խմիչքի 60-րդ միջազգային ցուցահանդեսին` ներկայացնելով 23 հայկական ընկերության արտադրանք։
«Արմենպրես»-ի փոխանցմամբ՝ ՀՀ էկոնոմիկայի նախարարությունից հայտնում են, որ Sial-ը հանդիսանում է Եվրոպայի ամենամեծ սննդի արդյունաբերության ցուցահանդեսներից մեկը։ Այն կազմակերպվում է երկու տարին մեկ Փարիզում՝ ներկայացնելով աշխարհի առաջատար գնորդներին մեկ վայրում: «Sial» ցուցահանդեսը յուրաքանչյուր տարի ունենում է ավելի քան 250,000 այցելու:
Այս տարի «Sial Paris 2024» միջազգային ցուցահանդեսին մասնակցում է Եվրոպայից, Մերձավոր Արևելքից, Աֆրիկայից և Ասիայից 7500 ընկերություն։
Ցուցահանդեսին միասնական տաղավարով կմասնակցեն նաև Միջազգային առևտրի կենտրոնի կողմից իրականացվող, ԵՄ կողմից ֆինանսավորվող «Հագուստի և ագրոբիզնեսի կայուն արժեշղթաների կառուցում Հայաստանում» ծրագրի շրջանակներում ագրոբիզնեսի ոլորտի 11 փոքր և միջին ձեռնարկություններ՝ ներկայացնելով համաշխարհային հարթակում հայկական չրեր, թեյեր, պահածոներ, հյութեր, և այլն: