Հյուսիսային Կորեան հայտարարել է, որ 1,4 միլիոն մարդ զինվորագրվել է՝ Հարավային Կորեայի հետ հնարավոր պատերազմի համար

ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ։ Կորեայի կենտրոնական լրատվական գործակալությունը (KCNA) հայտնել է, որ միայն այս շաբաթ Հյուսիսային Կորեայի շուրջ 1,4 միլիոն երիտասարդ քաղաքացի դիմել է բանակին միանալու կամ այնտեղ վերադառնալու համար։ 

«Արմենպրես»-ի փոխանցմամբ՝ KCNA-ը գրում է, որ նրանք ցանկանում են միանալ «սրբազան պատերազմին՝ հեղափոխության զենքը ձեռքին թշնամիներին ոչնչացնելու համար»։ Գործակալությունը նաև հրապարակել է լուսանկարներ, որոնցում երիտասարդները ստորագրում են բանակին միանալու դիմումներ:

Հոկտեմբերի 11-ին ԿԺԴՀ արտաքին գործերի նախարարությունը հայտնել էր, որ այս ամիս Փհենյանի երկնքում երեք անգամ հարավկորեական ԱԹՍ-ներ են նկատվել։ Հոկտեմբերի 13-ին Հյուսիսային Կորեայի առաջնորդ Կիմ Չեն Ընի քուրը՝ Կիմ Յո Չենը, սպառնացել էր Սեուլին «սարսափելի ողբերգական հետևանքներով», եթե հարավկորեական ԱԹՍ-ները ևս մեկ անգամ թռչեն Հյուսիսային Կորեայի վրայով։ 

Հարավային Կորեան հերքել է ԱԹՍ-ների արձակումը և Հյուսիսային Կորեային սպառնացել է «ռեժիմի վերջով»։ Հոկտեմբերի 15-ին Հյուսիսային Կորեայի առաջնորդը պաշտպանության հարցերով հանդիպում է անցկացրել՝ քննարկելու երկրի ինքնիշխանության խախտումը։ Իսկ ավելի ուշ ԿԺԴՀ-ն պայթեցրել է երկիրը Կորեայի Հանրապետության հետ կապող ճանապարհների հատվածները։