«Գյումրի զարգացման լաբորատորիա»-ի սաները Ռոբոտների համաշխարհային օլիմպիադայի միջազգային փուլին զբաղեցրել են 3-րդ պատվավոր հորիզոնականը
2 րոպեի ընթերցում
ԳՅՈՒՄՐԻ, 5 ՀՈԿՏԵՄԲԵՐԻ, ԱՐՄԵՆՊՐԵՍ: «Գյումրի զարգացման լաբորատորիա»-ի սաները Ռոբոտների համաշխարհային օլիմպիադայի միջազգային փուլին զբաղեցրել են 3-րդ պատվավոր հորիզոնականը։ Oլիմպիադան անցկացվել է Իտալիայի Բրեշա քաղաքում։ Գյումրեցիները մրցույթին ներկայացրել են «Smart sort» ռոբոտը։
Ինչպես «Արմենպրես»-ը տեղեկանում է Շիրակի մարզպետարանից, մարզպետ Մուշեղ Մուրադյանն աշխատակազմի պատասխանատուների հետ ընդունել է «Գյումրի զարգացման լաբորատորիա» հիմնադրամի սաներին, մարզիչներին, հիմնադրամի գործադիր տնօրենին և լաբորատորիայի հիմնադիրներին։
Մարզպետը շնորհավորել է մրցույթի մասնակիցներին ու մարզիչներին՝ նշելով, որ առանձնակի ոգևորիչ է, երբ գյումրեցի դպրոցականներն աչքի են ընկնում նպատակասլացությամբ և վերլուծական մտքով։ «Դուք կարողացաք կրկին ապացուցել, որ Հայաստանը, մասնավորապես Գյումրին, կարող է լինել առաջատար տեխնոլոգիական լուծումների ոլորտում։ Ինչ խոսք, մեծ գնահատանքի են արժանի ձեր նպատակասլացությունն ու նորարար գաղափարները, իսկ երբ այն գնահատում են ոչ միայն մեր երկրում, այլև միջազգային գնահատականի եք արժանանում, ապա ուղղակի մեկ նախադասությամբ կասեմ՝ մենք հպարտանում ենք ձեզանով»,-շեշտել է Շիրակի մարզպետը։
Երեխաները շնորհակալություն են հայտնել մարզպետին ջերմ ընդունելության և վերաբերմունքի համար։ Մուշեղ Մուրադյանի հետ զրույցում նրանք կիսվել են տպավորություններով, խոսել Ռոբոտների համաշխարհային օլիմպիադայի մասնակիցներից, մրցակցությունից և նշել, որ մարզպետի վերաբերմունքն իրենց պարտավորեցնում է նոր նշաձող սահմանելու և առաջ գնալու հաղթանակների ճանապարհով։
Հանդիպման ավարտին Ռոբոտների համաշխարհային օլիմպիադայի միջազգային փուլին լավագույն մասնակցության և 3-րդ տեղ զբաղեցնելու, ինչպես նաև սաներին պատրաստելու գործում ներդրած ջանքերի, բարձր արդյունքներ գրանցելու համար մարզպետը պատվոգրեր է հանձնել սաներին, մարզիչներին, տնօրենին և հիմնադիրներին։
Արմենուհի Մխոյան