Վերազինված և վերաբրենդավորված «Մոսկվա» կինոթատրոնն իր հյուրընկալ դռները բացեց արվեստասերների առաջ

ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Տևական դադարից հետո կինոյի երկրպագուների առաջ իր հյուրընկալ դռները բացեց վերազինված, վերաբրենդավորված «Մոսկվա» կինոթատրոնը։ Այն այժմ կրելու է «Կինոմոսկվա» անունը։

«Արմենպրես»-ի հաղորդմամբ՝ Երևանի սիրված կինոթատրոնի վերաբացման հանդիսավոր արարողությունը տեղի ունեցավ հոկտեմբերի 2-ին տարվա ամենասպասված «Ջոկեր: Խելագարություն երկուսի համար» ֆիլմի տարածաշրջանային առաջին ցուցադրությամբ։

Մինչ ֆիլմի ցուցադրությունը ներկաները հնարավորություն ունեցան վայելելու ֆիլմի մոտիվներով փոքրիկ երաժշտական ներկայացումը և դիտելու կարճ տեսանյութ, որն անդրադառնում էր սիրված կինոթատրոնի կառուցման պատմությանը:

Կինոթատրոնի գլխավոր տնօրեն Հովհաննես Ադոյանը, ողջունելով հյուրերին, շեշտեց՝«Կինոմոսկվա»-ն Երևանի խորհրդանիշներից է, քաղաքային կոլորիտի անբաժան մասը: «Հատկանշական է, որ 1936 թվականինհիմնադրումից մինչ այս պահը, հուսամ նաև ապագայում, հավատարիմ է մնացել ու կմնա հրաշքը կինոսիրողին հասցնելու իր սկզբնական կոչմանը: Այս իմաստով այն թերևս բացառիկ է: Բնականաբար սա մեկ մարդու կամ մեկ սերնդի վաստակ չէ, սա մեզ նախորդող տասնամյակների տքնաջան աշխատանքի, երբեմն էլ անհնարինը հնարավոր դարձնելու արդյունք է: Առանց նվիրյալ մարդկանց«Կինոմոսկվա»-ն մեզ այսօր չէր ներկայանա այն տեսքով ու նշանակությամբ, ինչի համար հիմնադրվել է ի սկզբանե»,-ընդգծեց Ադոյանը:

«Մոսկվա» կինոթատրոնի տնօրինությունը նախաձեռնել և իրականացրել է  Երևանի խորհրդանիշերից մեկը հանդիսացող կինոթատրոնի ներքին հարդարման աշխատանքները՝  գրկաբաց ընդունելու քաղաքի  բնակիչներին և հյուրերին՝  համաշխարհային ու տեղական  կինոարտադրության  ֆիլմերի դիտումն ու  ժամանցը միջազգային բարձր չափանիշներով կազմակերպելու  համար:  

Հիմնանորոգվել են բոլոր սրահները, համալրվել գերժամանակակից տեսալսողական սարքերով ու կահավորանքով։ Թարմացվել է օդափոխության և ջեռուցման համակարգը, հիմնովին բարեկարգվել են սանհանգույցները։ Հաշվի առնելով «Մոսկվա» կինոթատրոնի շենքի պատմամշակութային արժեքը՝արտաքին հարդարման և մաքրման աշխատանքների ժամանակ խստիվ պահպանվել է հուշարձանի ինքնատիպությունը։

Տեխնիկական վերազինմամբ նորացվել են կինոթատրոնի և՛  ձայնային տեխնիկան, և՛ էկրանները: Տեղադրվել են կինոէկրանների արտադրության ոլորտում առաջատար Harkness Screens բրիտանական ընկերության առանձանահատուկ էկրաններ։ Լազերային պրոյեկցիայի պայմաններում դրանք ապահովում են գույնի պայծառություն և լույսի հավասարաչափ բաշխում, ինչը թույլ է տալիս  դահլիճի ցանկացած անկյունից  տեսնել բարձր որակի պատկեր: Կինոդահլիճներն անցնում են 4K լազերային պրոյեկցիայի․ Barco SP4K-35 4-րդ սերունդ. սա նշանակում է, որ պատկերի հստակությունն այսուհետ կապված չէ լամպերից: «Կինոմոսկվայի» դահլիճներում տեղադրվել են DOLBY CP950 նորագույն ձայնային պրոցեսորներ, որոնք թույլ են տալիս իրականացնել ձայնային կարգավորումներ նաև ATMOS տեխնոլոգիաներին համապատասխան: LUIS Wassman ձայնային համակարգը հնարավորություն է տալիս հավասարաչափ տարածել ձայնը դեպի դահլիճի նստելատեղեր՝ զգալիորեն բարձրացնելով ընկալման որակը և մեծացնելով տպավորությունը:

Կինոթատրոնի նոր տարբերանշանում պատմական շենքն է՝ վերևից, որը հետաքրքիր զուգադիպությամբ  ունի լատիներեն  «M» տառի ձևը։ Յուրահատուկ տարբերանշանը  ոչ միայն պատկերում է շենքի բացառիկ ճարտարապետությունը, այլև ընդգծում է  նշանակությունը Երևանի քաղաքային լանդշաֆտում, խորհրդանշում է  Երևանում «Կինոմոսկվայի» կենտրոնական դիրքը, դերը՝  որպես սերունդների մշակութային կենտրոն։

«Կինոմոսկվա»-ի նոր կարգախոսը՝ «Արի կինոյի աշխարհ», հրավեր է բոլորին՝ բացահայտելու ոչ միայն կինոյի կախարդական աշխարհը, այլև վերագտնելու մի վայր, որը երկար տարիներ եղել է Երևանի մշակութային ժառանգության անբաժանելի մասը։