398.94
Պատգամավորները Գրիգոր Մինասյանի պաշտոնանկության հարցով ստորագրությունները ներկայացրել են ՔՊ խմբակցության ղեկավարությանը
2 րոպեի ընթերցում
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Ազգային ժողովի «Քաղաքացիական պայմանագիր» խմբակցության պատգամավորները, որոնք ստորագրահավաք էին սկսել՝ քննարկելու Արդարադատության նախարար Գրիգոր Մինասյանի պաշտոնանկության հարցը, ստորագրությունները ներկայացրել են խմբակցության ղեկավարությանը:
«Արմենպրես»-ի հաղորդմամբ՝ այս մասին ԱԺ-ում լրագրողների հետ զրույցում ասաց խմբակցության անդամ, ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը:
«Ոչ մեկի համար գաղտնիք չէ, որ մեր ժողովուրդը դժգոհ է երկրում արդարադատության ռեֆորմների ընթացքից, բովանդակությունից և կադրային քաղաքականությունից»,-ասաց Քոչարյանը:
Ըստ նրա՝ ստորագրահավաքի հիմքում այն հարցերն են, որոնց շուրջ դժգոհություններ կան:
Պատգամավորի կարծիքով՝ ստորագրահավաքով, ըստ էության, իրականացվում է պառլամենտական ժողովրդավարության գործընթաց: «Շատ լավ գործընթաց է: Ժողովրդավարական երկիր ենք: Առաջնային մանդատ կրող կառույց է ԱԺ-ն, և ԱԺ պատգամավորները կարող են իրենց տեսակետները հայտնել ու ստանալ պատասխաններ»,-ասաց Քոչարյանը:
Նրա խոսքով՝ վարչապետ Նիկոլ Փաշինյանի առաջարկությամբ է, որ կուսակցության շրջանակներում շատ անկեղծ քննարկումներ են եղել:
«Ես, ինչքանով գիտեմ, ստորագրություններն արդեն ներկայացված են խմբակցության ղեկավարությանը»,-ասաց նա՝ հավելելով, որ ստորագրությունների թիվը բավարար է:
Բաժանորդագրվեք մեր ալիքին Telegram-ում