Գյումրիի ավագանին չհաստատեց «ՖեստիՎառ»-ի տաղավարների վարձակալության գումարը համայնքի միջոցներից հատկացնելու նախագիծը
2 րոպեի ընթերցում
![Գյումրիի ավագանին չհաստատեց «ՖեստիՎառ»-ի տաղավարների վարձակալության գումարը համայնքի միջոցներից հատկացնելու նախագիծը](http://armenpress.am/resized/480/storage/images/articles/2024/09/10/WxcjXzgYhkVJjerfp5cNxaACHQB8mNCBgNj66VXY.webp)
ԳՅՈՒՄՐԻ, 10 ՍԵՊՏԵՄԲԵՐԻ, ԱՐՄԵՆՊՐԵՍ։ Գյումրիի ավագանին չհաստատեց «ՖեստիՎառ»-ի ժամանակ տաղավարների վարձակալության գումարը համայնքային միջոցներից հատկացնելու նախագիծը՝ թերի հիմնավորման պատճառով։
Ինչպես տեղեկացնում է «Արմենպրես»-ը, Գյումրիում հուլիսի 27-ին անցկացված «ՖեստիՎառ» միջոցառման շրջանակներում տաղավարների վարձակալման համար պահանջվող 2 մլն 434 հազար 350 ՀՀ դրամը համայնքային բյուջեից հատկացնելու նախագիծը ավագանին քննարկեց սեպտեմբերի 10-ին՝ ավագանու հերթական նիստի ժամանակ։
Նախագիծը, ըստ ավագանու անդամների, թերի է՝ չունի պատշաճ հիմնավորում․ փաստաթղթում հրապարակված չէ, թե որ կազմակերպությունից և քանի տաղավար է վարձակալվել։ Ըստ ավագանու անդամների՝ Հանրային հեռուստաընկերության տնօրենի՝ համայնքի ղեկավարին ուղղված գրությունը ևս թերի է եղել։
Ավագանու «Զարթոնք» խմբակցության անդամ Գոռ Մանուկյանը նշեց, որ որոշման նախագիծն իրավաչափ չէ, քանի որ համայնքապետարանն, առանց ստանալու ավագանու համաձայնությունը, արդեն իսկ մեկ անձից գնում է կատարել։
Նիստին ներկա ավագանու անդամների քվեարկության արդյունքներով որոշման նախագիծը չհաստատվեց։
Ավագանու անդամները համայնքապետարանին առաջարկեցին որոշման նախագիծը հաջորդ նիստի օրակարգում ընդգրկել՝ կցելով հիմնավորումն ու ծախսերի ուղղությունները:
Հուլիսի 27-ին ՀՀ կրթության, գիտության, մշակույթի եւ սպորտի նախարարության ֆինանսական աջակցությամբ, Հանրային հեռուստաընկերության հետ համատեղ անցկացված միջոցառմանը՝ «ՖեստիՎառ»-ին ոչ պաշտոնական տվյալներով մասնակցել է 50 հազարից ավելի քաղաքացի։
Արմենուհի Մխոյան