Լոռին, Սևանը, Դիլիջանն ու Ծաղկաձորը՝ Հայաստան այցելող զբոսաշրջիկների նախընտրելի ուղղություններ
4 րոպեի ընթերցում
![Լոռին, Սևանը, Դիլիջանն ու Ծաղկաձորը՝ Հայաստան այցելող զբոսաշրջիկների նախընտրելի ուղղություններ](http://armenpress.am/resized/480/storage/images/articles/2024/09/03/3EyMoKTa01lu1MMDRoNw7ST08vw3AGa5abqq2Sam.webp)
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Համաձայն ՀՀ սահմանային անցման կետերից ստացված տվյալների՝ 2024 թվականի հուլիսին Հայաստան զբոսաշրջային այցելությունների ընդհանուր քանակը կազմել է շուրջ 237 հազար 600:
«Արմենպրես»-ի հետ զրույցում այս մասին ասաց Զբոսաշրջության կոմիտեի միջազգային համագործակցության վարչության պետի տեղակալ Անուշ Բաբայանը՝ նշելով, որ ցուցանիշը նախորդ ամսվա՝ հունիսի հետ համեմատ աճել է շուրջ 31 տոկոսով, իսկ եթե համեմատենք նախորդ տարվա հուլիս ամսվա հետ, կա նվազում՝ 6-ից 7 տոկոսով:
«Այս պահին ունենք հունվար-հուլիսի ամփոփված տեղեկատվությունը, համաձայն որի՝ Հայաստան զբոսաշրջային այցելությունների թիվը կազմել է շուրջ 1 միլիոն 184 հազար: Ցուցանիշը նախորդ տարվա յոթ ամսվա համեմատ նվազել է 6 տոկոսով»,-ասաց նա:
Անուշ Բաբայանի խոսքով՝ եթե այս տարվա 7 ամսվա ցուցանիշները համեմատենք 2019 թվականի նույն ժամանակահատվածի հետ, ապա կարող ենք նշել, որ գրանցվել է այցելուների թվի աճ՝ շուրջ 21 տոկոսով: Իսկ 2019 թվականի հուլիսի համեմատ այցելությունների թիվն այս տարվա հուլիսին աճել է շուրջ 17 տոկոսով:
2023 թվականի 7 ամիսների համեմատ այս տարվա նույն ժամանակահատվածում գրանցված նվազումը մասնագետը հիմնականում պայմանավորում է ՌԴ-ից Հայաստան այցելությունների կրճատմամբ:
«Ռուսաստանից Հայաստան զբոսաշրջային այցելությունների թիվը 2024 թվականի հունվար-հուլիս ժամանակահատվածում կազմել է շուրջ 500 հազար, իսկ նախորդ տարվա նույն ժամանակահատվածի համեմատ ունենք 23 տոկոսով նվազում: Նշեմ, որ ընդհանուր այցելությունների թվում ՌԴ-ից այցելությունները կազմում են շուրջ 42 տոկոսը»,-ասաց Զբոսաշրջության կոմիտեի միջազգային համագործակցության վարչության պետի տեղակալը:
Սակայն կոմիտեից նշեցին, որ վերջին տարիներին զբոսաշրջային այցելությունների որոշակի աճ է գրանցվել մի շարք այլ երկրներից, այդ թվում՝ Հնդկաստանից, Ֆիլիպիններից և Չինաստանից՝ որոշակիորեն լրացնելով ՌԴ-ից այցելությունների նվազման հետևանքով ձևավորված բացը:
Իսկ դեպի Հայաստան զբոսաշրջային աճն ապահոված երկրների ցանկը հիմնականում պահպանվել է՝ Ռուսաստանի Դաշնություն, Վրաստանը, Իրան, ԱՄՆ:
«Դրանք այն հիմնական երկրներն են, որոնք Հայաստանի համար հանդիսանում են հիմնական շուկաներ: Այս երկրներին հաջորդում են Եվրոպական երկրները՝ Ֆրանսիա, Գերմանիա և այլ տարածաշրջանների մի շարք երկրներ»,- ընդգծեց Բաբայանը:
«Rima travel» տուրիստական գործակալության տնօրեն Ռիմա Խաչատրյանը նշեց՝ վերջին տարիներին Հայաստան ժամանող զբոսաշրջիկների նախընտրությունները մի փոքր փոխվել են:
«Նախորդ տարիներին Հայաստան այցելող զբոսաշրջիկները առավել շատ նախընտրում էին Նորավանք, Տաթևի վանական համալիր, Խնձորեսկ, Սատանի կամուրջ ուղղությունները, սակայն այս տարի մի փոքր այլ է: Զբոսաշրջիկները նախընտրում են դեպի Սևան, Դիլիջան, Ծաղկաձոր ուղղությունները, ինչպես նաև Լոռին, որն այս տարի շատ ավելի ակտիվ է, քան նախորդ տարիներին»,- նշեց տուրիստական գործակալության տնօրենը:
Ռիմա Խաչատրյանը ընդգծեց՝ զբոսաշրջիկները տարբեր են և նախընտրությունները ևս տարբեր են, սակայն վերջին տարիներին բավականին մեծացել է արկածային և էքստրեմալ հանգիստը նախընտրող զբոսաշրջիկների թիվը:
Ըստ գործակալության տնօրենի՝ նախորդ տարիների համեմատ ավելացել է Եվրոպայից ժամանող զբոսաշրջիկների թիվը:
Գայանե Գաբոյան