Փաշինյանը ՀԱՊԿ-ին մասնակցությունը սառեցնելու ՀՀ-ի որոշումն այս փուլում համարում է բավարար
1 րոպեի ընթերցում
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Հայաստանը բոլոր մակարդակներում սառեցրել է մասնակցությունը ՀԱՊԿ-ին, այս փուլում այդ որոշումը բավարար է:
«Արմենպրես»-ի հաղորդմամբ՝ այս մասին ասուլիսում ասաց Հայաստանի վարչապետ Նիկոլ Փաշինյանը՝ պատասխանելով ՀԱՊԿ-ից դուրս գալու հավանականության վերաբերյալ հարցին:
«Հայաստանի Հանրապետությունը բոլոր մակարդակներում սառեցրել է իր մասնակցությունը ՀԱՊԿ-ին: Մենք այս փուլում այդ որոշումը համարում ենք բավարար: Կարող է լինել բանավեճ, մեկը կարող է ասել, որ բավարար է, մյուսը կարող է ասել՝ անբավարար է: Բայց պետք է նայենք, թե ով ինչ գնահատողական իրավասություն ունի»,-ասաց Փաշինյանը:
Վարչապետը շեշտեց՝ ինքը հարգում է բոլոր տեսակետները, բայց իշխանությունը կայացրել է այն որոշումը, որը կայացրել է: Այս պահին այլ որոշում կայացնելու անհրաժեշտություն Հայաստանը չի տեսնում, սակայն դա չի նշանակում, որ հաջորդ պահին այլ որոշում կայացնելու անհրաժեշտություն չի տեսնի: