Թուրքիայում անտառային հրդեհների պատճառով ավելի քան 4 հազար մարդ է տարհանվել
1 րոպեի ընթերցում
![Թուրքիայում անտառային հրդեհների պատճառով ավելի քան 4 հազար մարդ է տարհանվել](http://armenpress.am/resized/480/storage/images/articles/2024/08/18/oCfki9h3R6haKxawhyz9Q7EpH7gpr3X3f7n4ZMSH.webp)
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Թուրքիայի Իզմիրի նահանգում հրշեջներն արդեն չորս օր շարունակ պայքարում են անտառային հրդեհների դեմ:
«Արմենպրես»-ի փոխանցմամբ՝ ինչպես հաղորդում է թուրքական Hürriyet-ը, մեջբերելով երկրի Գյուղատնտեսության և անտառային տնտեսության նախարարի խոսքը, քամին, բարձր խոնավությունը և նոր բռնկումները դժվարացնում են հրշեջների աշխատանքը։
Նախարարի խոսքով՝ անտառային հրդեհներն այս ընթացքում շարունակվում են նաև Այդինում, Մուղլայում, Բոլուում և Մանիսայում, իսկ, ընդհանուր առմամբ, ներկայում ութ ակտիվ հրդեհ կա: Հաղորդվում է, որ ներկայում անտառային հրդեհների հետ կապված կասկածանքով հինգ մարդ է ձերբակալվել։
Ըստ աղբյուրի՝ հրդեհների պատճառով Իզմիրում տարհանվել է 4 հազար 159 մարդ։