Ճապոնիայում 5,3 մագնիտուդով երկրաշարժ է տեղի ունեցել

ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ: Ճապոնիայի արևելյան մասում՝ Տոկիոյից ոչ հեռու, 5,3 մագնիտուդով երկրաշարժ է գրանցվել. ցունամիի վտանգ չկա։ «Արմենպրես»-ի փոխանցմամբ՝ այս մասին հաղորդում է Kyodo գործակալությունը՝ վկայակոչելով Ազգային օդերևութաբանական վարչությունը։

Ստորգետնյա ցնցումների էպիկենտրոնը գտնվել է մայրաքաղաքի հարևան Կանագավայի պրեֆեկտուրայում։ Օջախն ընկած է եղել 10 կմ խորության վրա։

Զոհերի կամ ավերածությունների մասին տեղեկատվություն չի ստացվել։ 

Ճապոնիայի օդերևութաբանական վարչությունը նշում է, որ այս երկրաշարժն, ամենայն հավանականությամբ, կապ չունի Նանկայի խզվածքում հզոր երկրաշարժի հավանականության հետ։ Երկրաշարժի սպառնալիքի պատճառով Ճապոնիայի վարչապետը չեղարկել է իր այցը Կենտրոնական Ասիա։

Օգոստոսի 8-ին Կյուսյու կղզու մերձակայքում 7,1 մագնիտուդով երկրաշարժից հետո երկրում գործում է Նանկայի խզվածքում  8 մագնիտուդով հուժկու երկրաշարժի առաջացման հավանականության մասին ժամանակավոր նախազգուշացում: Խզվածքը գտնվում է Խաղաղ օվկիանոսում՝ Ճապոնիայից հարավ: