ՌԴ Վոլգոգրադի մարզում Սու-34 ինքնաթիռ է կործանվել

ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ։ Ռուսաստանի Դաշնության Վոլգոգրադի մարզում պլանային ուսումնական թռիչք կատարելու ժամանակ Սու-34 կործանիչը վթարի է ենթարկվել։

«Արմենպրես»-ի հաղորդմամբ՝  կործանիչի անկման մասին հայտնել է ՌԴ պաշտպանության նախարարությունը։

«Վոլգոգրադի մարզում պլանային ուսումնական թռիչքի ժամանակ կործանվել է ռուսական օդատիեզերական ուժերի Սու-34 ինքնաթիռը, օդաչուների կյանքին վտանգ չի սպառնում, թռիչքն իրականացվել է առանց ռազմամթերքի», - մանրամասնել է ՌԴ ՊՆ-ն՝ հավելելով, որ ինքնաթիռի կործանման հետևանքով գետնի վրա ավերածություններ չկան։

Նախարարությունը պարզաբանել է, որ ինքնաթիռի կործանման նախնական պատճառը եղել է տեխնիկական անսարքությունը։ Տեղում աշխատում է Ռուսաստանի օդատիեզերական ուժերի հանձնաժողովը։