Երկու կուսակցություններից մի խումբ կոնգրեսականներ կհետաքննեն Թրամփի դեմ մահափորձը
2 րոպեի ընթերցում
![Երկու կուսակցություններից մի խումբ կոնգրեսականներ կհետաքննեն Թրամփի դեմ մահափորձը](http://armenpress.am/resized/480/storage/images/articles/2024/07/23/enx4D2rN5vNRqpenqsMEuD0Os3DEUKu7GGpRd5T6.webp)
ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ։ Կոնգրեսականների երկկուսակցական խումբը կհետաքննի ԱՄՆ-ի նախկին նախագահ Դոնալդ Թրամփի անհաջող մահափորձը, հետաքննությունը կղեկավարեն յոթ հանրապետականներ և վեց դեմոկրատներ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին ասված է Ներկայացուցիչների պալատի խոսնակ Մայք Ջոնսոնի և փոքրամասնության առաջնորդ Հեքիմ Ջեֆրիսի համատեղ հայտարարության մեջ։
«Ներկայացուցիչների պալատն այս շաբաթ կքվեարկի աշխատանքային խմբին և նրա անդամներին հաստատելու բանաձևին: Աշխատանքային խումբը բաղկացած կլինի յոթ հանրապետականներից և վեց դեմոկրատներից», - ասված է հայտարարության մեջ:
Հետաքննության շրջանակներում կոնգրեսականների խնդիրները կլինեն Թրամփի դեմ մահափորձի հանգամանքների և իրավապահների թույլ տված սխալների պարզաբանումը։ Նախաքննության ընթացքում պատասխանատվության կենթարկվեն միջոցառման անվտանգությունը չապահովելու համար մեղավորները։ Աշխատանքային խմբի աշխատանքի արդյունքներով նրանք նաև առաջարկություններ կներկայացնեն հանրային ծառայությունների բարեփոխումների և անհրաժեշտ օրենսդրական փոփոխությունների իրականացման վերաբերյալ։
Հուլիսի 13-ին Փենսիլվանիայում Թրամփի նախընտրական ելույթի ժամանակ հրաձգություն էր տեղի ունեցել, նախկին նախագահը վիրավորվել էր ականջից, հանդիսատեսներից մեկը սպանվել էր, ևս երկուսը ծանր վիրավորվել։ ԱՄՆ-ի Գաղտնի ծառայությունը հայտնել է, որ սպանել է կասկածյալին, ով մի քանի կրակոց է արձակել բեմի ուղղությամբ: Նա թաքնվել էր արտադրական շենքի տանիքում՝ բեմից մոտ 100 մետր հեռավորության վրա՝ այն տարածքից դուրս, որտեղ անցկացվում էր միջոցառումը։