ՀՀ ԱԺ արտաքին հարաբերությունների մշտական հանձնաժողովի նախագահն ընդունել է Ալբանիայի ԱԳՆ պատվիրակությանը
2 րոպեի ընթերցում
ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: ՀՀ Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանը հուլիսի 18-ին ընդունել է Ալբանիայի արտաքին գործերի նախարարության քաղաքական և ռազմավարական հարցերով գլխավոր տնօրեն Գազմենդ Բարբուլուշիի գլխավորած պատվիրակությանը:
Ինչպես «Արմենպրես»-ին տեղեկացրին ՀՀ Ազգային ժողովից, ողջունելով հյուրերին` Սարգիս Խանդանյանը կարևորել է Հայաստանի և Ալբանիայի միջև համագործակցության խորացումը, միջխորհրդարանական կապերի զարգացումը:
Ըստ աղբյուրի՝ անդրադառնալով Հայաստան-Եվրամիություն գործընկերության ընդլայնվող օրակարգին` հանձնաժողովի նախագահն արժևորել է Եվրամիության երկրներ մուտքի արտոնագրերի ազատականացման շուրջ երկխոսության մեկնարկը: Սարգիս Խանդանյանն ընդգծել է, որ Ալբանիան եվրոպական այն քիչ երկրներից է, ուր ՀՀ քաղաքացիները կարող են մեկնել առանց մուտքի արտոնագրի: Նշվել է, որ այդ հանգամանքով պայմանավորված էլ՝ վերջին շրջանում ավելացել է Ալբանիա մեկնող հայ զբոսաշրջիկների թիվը:
Նշվում է, որ հանդիպմանը Սարգիս Խանդանյանն ալբանացի դիվանագետներին ներկայացրել է մեր երկրում տիրող անվտանգային իրավիճակը, մարտահրավերները, խոսել Ադրբեջանի և Թուրքիայի հետ հարաբերությունների կարգավորման գործընթացների մասին:
ՀՀ ԱԺ տեղեկացմամբ՝ շնորհակալություն հայտնելով ընդունելության համար` Ալբանիայի ԱԳՆ քաղաքական և ռազմավարական հարցերով գլխավոր տնօրենն իր իրավասությունների շրջանակում տարբեր ոլորտներում փոխգործակցության զարգացմանը նպաստելու պատրաստակամություն է հայտնել: Գազմենդ Բարբուլուշին համաձայնել է, որ անհրաժեշտ է սերտացնել երկու երկրների միջխորհրդարանական կապերը:
