ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ։ Քենիայի մայրաքաղաք Նայրոբիում ոստիկանության հետ բախումների ժամանակ մի քանի ցուցարարներ են բերման ենթարկվել, ովքեր բողոքում են հարկերի բարձրացման օրինագծի դեմ։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։
Ավելի վաղ հաղորդվել էր, որ Քենիայի խոշոր քաղաքներում վերսկսվել են բողոքի ցույցերը, իշխանությունները գործի են դրել զրահամեքենաներ և սկսել են արցունքաբեր գազ կիրառել ցուցարարների դեմ։
Երկրի իրավապաշտպան կազմակերպությունը՝ Քենիայի Մարդու իրավունքների ազգային հանձնաժողովը, ավելի վաղ հայտնել էր, որ Քենիայում հարկերը բարձրացնելու օրինագծի դեմ բողոքի ցույցերի ընթացքում առնվազն 39 մարդ է զոհվել, ավելի քան 360 մարդ վիրավորվել է։
Բողոքի նոր ալիքը Քենիայում՝ կապված մի շարք ապրանքների և ծառայությունների հարկերը բարձրացնելու կառավարության ծրագրերի հետ, սկսվել է հունիսի կեսերին։ Ըստ այդմ՝ բյուջեի նախագծում փոփոխություններ են կատարվել, որոնց համաձայն՝ 16 տոկոս ավելացված արժեքի հարկ է սահմանվում հացի գնման, շաքարավազի տեղափոխման, բջջային և ֆինանսական ծառայություններից օգտվելու, օտարերկրյա արժույթով գործարքների համար, ինչպես նաև սահմանվել է ավտոմոբիլային տրանսպորտային միջոցների 2,5% հարկ և բուսական յուղի ակցիզային հարկ։
Քենիայի նախագահ Ուիլյամ Ռուտոն հայտարարել է ցուցարարների հետ երկխոսություն սկսելու կառավարության պատրաստակամության մասին։ Ոստիկանությունը ցուցարարներին ցրելու համար արցունքաբեր գազ և ռետինե փամփուշտներ է կիրառել։ Ռուտոն ասել է, որ չի ստորագրի բյուջեի օրինագիծը, որը լայնածավալ բողոքի ցույցեր է առաջացրել երկրում: