ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: 33-րդ ամառային Օլիմպիական խաղերի ընթացքում Փարիզի սրտում կգործի «Հայաստանի տուն»-ը, որտեղ մեկ հարկի տակ կհամախմբվեն հայկական սպորտն ու մշակույթը ներկայացնող մարզիկները, երկրպագուները, հայ համայնքը:
«Արմենպրես»-ի հետ զրույցում Հայաստանի Հանրապետության կրթության, գիտության, մշակույթի և սպորտի նախարարի տեղակալ, «Հայաստանի տան» համակարգող Կարեն Գիլոյանը առավել մանրամասն ներկայացրեց «տան» գաղափարն ու անդրադարձավ սպասվելիք իրադարձություններին:
-Պարոն Գիլոյան, Օլիմպիական խաղերի ընթացքում Փարիզում կգործի «Հայաստանի տունը»: Կբացե՞ք փակագծերը, պատմեք, թե ինչ է այն իրենց ներկայացնելու:
-Օլիմպիական խաղերի ժամանակ լավ մշակույթ է ունենալ «երկրի տուն», որտեղ կկատարվեն ընդունելություններ, հանդիպումներ և կպահպանվի օլիմպիական մթնոլորտը: Որպես 8 Օլիմպիական խաղերի մասնակից տեսել եմ, թե շատ երկրներ ինչպես են արել այդ ամենը: Այս անգամ որոշեցինք, որ հետ չենք մնալու ու հատկապես այն պատճառով, որ խաղերը Փարիզում են, մենք մեծ հայկական համայնք, երկրպագուների հսկայական բանակ ունենք:
-Ո՞ւմ հետ եք համագործակցել:
-Նախաձեռնությունն իր ամբողջության մեջ պատկանում է Հայաստանի Հանրապետության կառավարությանը: Այս ճանապարհին մենք համագործակցեցինք Մարսելի հայկական համայնքի, ինչպես նաև Հայկական բարեգործական ընդհանուր միության հետ: Հենց ՀԲԸՄ-ն էլ մեզ անվճար տրամադրեց Փարիզի 17-րդ թաղամասում գտնվող տարածքը, որտեղ կկազմակերպվի «Հայաստանի տունը»: Մենք նաև անմիջական կապի մեջ ենք Ֆրանսիայում Հայաստանի դեսպանության հետ: Վերջնական ծրագիրը կկազմենք առաջիկա օրերին, երբ Հայաստան կժամանեն ՀԲԸՄ-ի ներկայացուցիչները: Այս ծրագիրը հիմնված կլինի մեր մարզիկների մասնակցության օրերի վրա:
-Ե՞րբ կլինի «Հայաստանի տան» բացման արարողությունը, ի՞նչ մարզամշակույթային հայտնի անձինք ներկա կլինեն այս ամենին:
-Օլիմպիական խաղերի բացման պաշտոնական արարողությունից մեկ օր առաջ` հուլիսի 25-ին, մենք կբացենք «Հայաստանի տունը»` Փարիզի սրտում: «Հայաստանի տան» դեմքը կլինի աշխարհահռչակ Յուրի Ջորկաեֆը. նրան և հայերն են շատ սիրում, և ֆրանսիացիները: Նա մեծ խանդավառությամբ ընդունել է մեր առաջարկը: Ըստ նախապես հրապարակված ծրագրի՝ երկրպագուները կկարողանան գալ և այդտեղից հետևել Խաղերի ընթացքին: Սա արվում է նաև նրանց համար, ովքեր տոմսեր չեն կարողանա ձեռք բերել: Իսկ բոլոր մրցումներից հետո մեր մարզիկները, մարզիչները և ֆեդերացիաների ներկայացուցիչները հանդիպումներ կունենան «Հայաստանի տանը»:
-Ի՞նչ խորհուրդ կունենա «Հայաստանի տունն» այդ օրերին:
-Նպատակ ունենք շատ հայկական մթնոլորտ ստեղծել: Դրա համար համագործակցել ենք նաև ԿԳՄՍ նախարարության մշակութային վարչության հետ: Ու այնտեղ փոքրիկ տաղավարներ կլինեն հայկականը խորհրդանշող իրերով` դրոշներով, շապիկներով, մրգով, շոկոլադով և այլն: Կուզենայինք ստեղծել այնպիսի մի մթնոլորտը, որ ներս մտնող զգա, որ փոքրիկ Հայաստանում է: Բնականաբար, մենք համագործակցում ենք ՀԱՕԿ-ի հետ և կկազմակերպենք նաև Հայաստանի օր: Հայաստանի օլիմպիական կոմիտեն կհրավիրի այլ երկրների օլիմպիական կոմիտեներին և մենք նրանց կներկայացնենք մեր սպորտային նվաճումները, մշակույթը, արվեստը, պատմությունը, գիտությունը, Հայաստանի Հանրապետությունը՝ համակողմանիորեն: Մենք ուզում ենք, որ Օլիմպիական խաղերը տոն լինեն ոչ միայն Հայաստանում ապրող հայերի, այլ նաև սփյուռքում գտնվող հայերի համար: «Հայաստանի տուն»-ը դրոշներով զարդարված իսկական հայկական տուն կլինի: Լիահույս եմ, որ ամեն առավոտ, երբ բացվի տունը, այնտեղ հերթեր կլինեն, որ միասին վայելենք այդ պայքարով լի 17 օրը:
-Էլ ո՞ւմ եք ակնկալում տեսնել «Հայաստանի տանը», ովքեր միացնում են բարեկամական երկու երկրները` Հայաստանն ու Ֆրանսիան:
-Այո, այժմ կապի մեջ ենք աշխարհահռչակ ավտոմրցարշավորդ Ալեն Պրոստի, ֆուտբոլի աշխարհի չեմպիոն Ալեն Պողոսյանի հետ: Նաև մշակութային դեմքերի: Դեռևս ժամանակ ունենք և ամեն ինչ արվելու է, որ մեր հայրենակիցները տեղեկացված լինեն, որ գան ու հայկական տան մի մասը լինեն: Մուտքն ազատ է լինելու: Այս տարի նաև առաջին անգամ պաշտոնական կրծքանշան ենք ունենալու, որը շատ սիմվոլիկ է, շատ հայկական: