1 րոպեի ընթերցում
ԵՐԵՎԱՆ, 8 ՀՈՒՆԻՍԻ, ԱՐՄԵՆՊՐԵՍ: Վարչապետ Նիկոլ Փաշինյանը Լոռու մարզ կատարած այցի շրջանակներում եղել է նաև Ախթալայում և ծանոթացել ջրհեղեղի հետևանքով փլուզված կամրջի վերակառուցման աշխատանքներին։
«Արմենպրես»-ի հաղորդմամբ՝ այս մասին ՀՀ վարչապետը «Ֆեյսբուքի» իր էջում գրառում է կատարել՝ կից հրապարակելով նաև տեսանյութ, որտեղ նա զրուցում է բնակիչների հետ, ինչից հետո պաղպաղակ հյուրասիրում երեխաներին։
«Կառավարությունը տեղի բնակիչներին ապահովել է անհրաժեշտ սննդով և առաջին անհրաժեշտության այլ ապրանքներով»,-գրառման մեջ նշել է վարչապետը։
Բնակիչները շնորհակալություն են հայտնել վարչապետին Ախթալայի կամրջի արագ վերականգնման և տրամադրված օգնության համար։
Նիկոլ Փաշինյանն էլ, իր հերթին, Ախթալայի բնակիչների հետ զրույցի ընթացքում հայտարարել է, որ անհրաժեշտ է նոր կամուրջ կառուցել։
Բնակիչներից մեկը վարչապետին հայտնել է, որ ՀՀ տարածքային կառավարման և ենթակառուցվածքների նախարար Գնել Սանոսյանի հետ կոորդինացնում են դեպի բնակավայր սննդի առաքումներն իրականացնելու հարցը։