«Գեղարքունիք» ջրօգտագործողների ընկերությունը նախապատրաստվում է ոռոգման շրջանի մեկնարկին

ԳԱՎԱՌ, 4 ՀՈՒՆԻՍԻ, ԱՐՄԵՆՊՐԵՍ։ Գեղարքունիքի մարզում ավելի քան երկու ամիս է սկսվել և ընթանում են ոռոգման շրջանի նախապատրաստական աշխատանքները։

Ինչպես «Արմենպրես»-ին տեղեկացրեց «Գեղարքունիք» ՋՕԸ տնօրեն Արտաշ Սարդարյանը, իրականացվում են ներտնտեսային, միջտնտեսային ջրանցքների, պոմպակայանների ու խորքային հորերի մաքրման ու նորոգման, բոլոր ջրառներում օնլայն ջրաչափերի տեղադրման, հայտերի հավաքագրման աշխատանքներ։ «Նորոգման ուղարկված բոլոր պոմպերն արդեն պատրաստ են ու տեղադրված համապատասխան տեղերում, ինքնահոս ջրանցքների հիմնական մասը մաքրված ու նորոգված է, ջրառներում օնլայն ջրաչափերի տեղադրումն ավարտված է Գավառի ու Մարտունու տեղամասերում, իսկ Վարդենիսի տեղամասում գործընթացը կավարտվի մինչև ոռոգման նոր շրջանի մեկնարկը։ Ջրաչափերը տեղադրվում են այն նպատակով, որպեսզի փաստացի կարողանանք արձանագրել, թե որքան ջուր է մատակարարվել ոռոգման շրջանի ընթացքում։ Դրանք տեղադրվում են թե՛ պոմպակայաններում, թե՛ խորքային հորերում, թե՛ ինքնահոս ջրանցքների ջրառներում։ Զուգահեռ ընթանում են նաև հայտերի հավաքագրման աշխատանքները, որպեսզի մինչ ոռոգման շրջանի մեկնարկը հստակեցնենք մեր բաժանորդների թիվը, ոռոգելի տարածքների մակերեսները, ոռոգման ենթակա մշակաբույսերի տեսակները։ Անում ենք հնարավորը, որպեսզի ոռոգման շրջանը դիմավորենք կազմ ու պատրաստ։ Նախորդ տարվա ոռոգման վարձավճարները հավաքագրվել են շուրջ 97 տոկոսով։ Հուսանք, որ այս տարի ավելի բարձր արդյունքներ կապահովենք ջրառներում ջրաչափերի տեղադրման շնորհիվ»,-ներկայացրեց Արտաշ Սարդարյանը։

Խոսրով Խլղաթյան