ԵՄ-ի հետ հիմա աշխատում ենք շատ. ԱԳ նախարարը խոսեց համագործակցության ուղղություններից
1 րոպեի ընթերցում
ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: Հայաստանը Եվրամիության հետ աշխատում է շատ, կան առաջնահերթություններ, որոնք նոր իրողություններով պայմանավորված՝ վերանայվում են, արդյունքում կողմերը կհանգեն նոր փաթեթի:
«Արմենպրես»-ի փոխանցմամբ՝ այս մասին ասաց Հայաստանի արտաքին գործերի նախարար Արարատ Միրզոյանն ԱԺ մշտական հանձնաժողովների համատեղ նիստում «ՀՀ 2023 թվականի պետական բյուջեի կատարման մասին» տարեկան հաշվետվության քննարկմանը:
«ԵՄ-ի հետ հիմա աշխատում ենք շատ»,-ասաց Միրզոյանը:
Նա մատնանշեց երկու ուղղություն: Մեկը համագործակցության նոր առաջնահերթությունն է: «Ունենք առաջնահերթություններ, որոնք նոր իրողություններով պայմանավորված՝ վերանայում ենք և կհանգենք նոր փաթեթի»,-ասաց ԱԳ նախարարը:
Երկրորդ ուղղությունը Հայաստան-ԵՄ-ԱՄՆ ապրիլի 5-ի հանդիպումից բխող առաջնահերթությունների ուղղությունն է: «Դա պայմանականորեն կարող ենք անվանել Հայաստանի դիմակայունության բարձրացում: Հիմնականում այս երկու խմբերում կտեղավորեի մեր համագործակցության ներկա ուղղությունները»,-ասաց Միրզոյանը՝ հավելելով, որ վիզաների ազատականացման երկխոսության մեկնարկն էլ դրա մասն է: