«Արմենպրես»-ի ֆոտոլրատվության դպրոցի սաները ստացան սպասված հավաստագրերը
4 րոպեի ընթերցում
![«Արմենպրես»-ի ֆոտոլրատվության դպրոցի սաները ստացան սպասված հավաստագրերը](http://armenpress.am/resized/480/static/news/b/2024/05/1138373.jpg)
ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Շուրջ հինգ տարի «Արմենպրես» պետական լրատվական գործակալության ֆոտոլրատվության դպրոցը երիտասարդներին հնարավորություն է տալիս գիտելիքներ ձեռք բերել ֆոտոլրագրության բնագավառում, ՀՀ վաստակավոր լրագրող Ֆելիքս Առուստամյանի շնորհիվ սիրել լուսանկարչի մասնագիտությունը և հետագայում զբաղվել պրոֆեսիոնալ լուսանկարչությամբ:
Մայիսի 30-ին ֆոտոլրատվության դպրոցի 2023-2024 թվականի շրջանավարտներին «Արմենպրես»-ի տնօրեն Նարինե Նազարյանը հանձնեց սպասված հավաստագրերը, որոնք, ինչպես շրջանավարտներն են խոստովանում, իրենց համար կարևոր նշանակություն ունեն:
Շրջանավարտներին դիմելով՝ Նազարյանն ասաց՝ վստահ է՝ այն գիտելիքները, որոնք Ֆելիքս Առուստամյանը փոխանցել է, շատ կօգնեն երիտասարդներին և՛ հիմա, և՛ հետո: «Մենք հաճախ ենք լսում «պատկերավոր ասած» արտահայտությունը, ինչո՞ւ, որովհետև պատկերը երբեմն գալիս է լրացնելու այն, ինչը հնարավոր չէ փոխանցել խոսքով: Շատ արագ զարգացող աշխարհում, երբ երբեմն մեծ տեքստերին ծանոթանալու ժամանակ չի լինում, նյութերի վիզուալ հատվածը դառնում է ավելի խոսուն և թիրախային»,-շեշտեց Նազարյանը:
Նա շատ ուրախ կլինի, եթե «Արմենպրես»-ի ֆոտոլրատվության դպրոցը նաև մասնագիտական կողմնորոշման յուրահատուկ հարթակ դառնա:
2023-2024 թվականին դասերին, որոնք անվճար են, հաճախել է 13 մասնակից: «Մասնակիցների մեջ կան երեխաներ, որ շատ լավ «աչք» ունեն: Ուսանողներ են, դպրոցականներ, որոնք մեծ խանդավառությամբ են հաճախում դասերին, մասնակցում գործնական պարապմունքներին, ստանում հանձնարարություններ ու կերտում սեփական պորտֆոլիոն: Արդեն կան երեխաներ, որոնք հաջորդ տարվա դասընթացներին մասնակցելու ցանկություն են հայտնել»,-նշեց Առուստամյանը:
Լուսանկարչի խոսքով՝ դասընթացների մասնակիցների հետ սկսել է աշխատել զրոյից: Աշխատել են մեխանիկական տեսախցիկներով, ժապավեններով, հետո անցել են թվային ֆոտոխցիկներին: Առուստամյանը գոհ է կատարված աշխատանքից: Մասնակիցների լուսանկարներում բնությունն է, պատմամշակութային հուշարձաններն են, մարդիկ:
Տասնչորսամյա Մարի Կոստանդյանի խոսքով՝ ֆոտոդպրոցը զարգացրել է իր մտքի թռիչքն ու լուսանկարչության կարևոր հմտություններ է փոխանցել:
«Կրեատիվ մտքերը պետք էր ինչ-որ կերպ արտահայտել և կարծեցի, որ դա անելու ամենաարդյունավետ ձևը լուսանկարչությունն է: Որոշեցի սովորել այստեղ»,-ասաց նա: Մարիի լուսանկարներում գրքերն են, շենքերն են, բայց առաջիկայում նրա հերոսները կլինեն մարդիկ, որոնց կփորձի ներկայացնել տարբեր տեսանկյուններից:
Վիկտորյա Մկրտչյանը 21 տարեկան է և սովորում է Երևանի պետական համալսարանի ժուռնալիստիկայի ֆակուլտետի երրորդ կուրսում: «Համալսարանում ֆոտոլրագրության դաս ունեինք, բայց ժամերը քիչ էին: «Արմենպրես»-ում պրակտիկա էի անցնում և իմանալով ֆոտոդպրոցի մասին՝ ցանկություն հայտնեցի դասաժամերի պակասը լրացնել ֆոտոլրատվության դպրոցի դասերի օգնությամբ»,-նշեց Վիկտորյան, որը դասերին բավականին ուշ է միացել, բայց սովորել է ճիշտ աշխատել տեսախցիկի հետ, զարգացրել է լուսանկարչի տեսողությունը:
Տասնութամյա Էրիկա Սաֆարյանին լուսանկարչությունը գրավել է փոքրուց: Տեղեկանալով դասընթացների մասին՝ որոշել է դիմել: «Բազմաթիվ լուսանկարներ ունեմ, իսկ Ֆելիքս Առուստամյանի շնորհիվ սովորեցի ճիշտ լույսով աշխատել, ճանաչել տեսախցիկների օբյեկտիվները»,-նշեց նա: Էրիկան վստահեցրեց՝ առաջիկայում լուսանկարչությունը կդառնա իր մասնագիտությունը:
«Արմենպրես»-ի ֆոտոլրատվության դպրոցի դասընթացները կրկին մեկնարկելու են սեպտեմբերին: