ԵՏՀ խորհրդի նիստում ընդունվել են ինտեգրացիոն համագործակցության բարելավմանը միտված որոշումներ

ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ։ Հայաստանի Հանրապետության փոխվարչապետ Մհեր Գրիգորյանի գլխավորությամբ Եվրասիական տնտեսական հանձնաժողովի (ԵՏՀ) խորհրդի անդամները և Ռուսաստանի Դաշնության փոխվարչապետ Ալեքսեյ Օվերչուկը քննարկել են ինտեգրացիոն համագործակցության որոշ ոլորտների կարգավորման գործիքների կատարելագործման հարցը։

«Արմենպրես»-ի հաղորդմամբ՝ այս մասին նշվում է ՌԴ կառավարության տարածած հաղորդագրության մեջ։

«Կողմերը քննարկել են միության իրավապայմանագրային դաշտի մշակման, ինտեգրացիոն համագործակցության առանձին ոլորտների կարգավորման գործիքների կատարելագործման և խորհրդի իրավասությանը պատկանող այլ հարցեր»,- նշվում է հաղորդագրության մեջ։

Հաղորդվում է, որ խորհրդի նախագահը շնորհավորել է հանդիպման մասնակիցներին ԵԱՏՄ օրվա կապակցությամբ (խմբ․ մայիսի 29-ին լրացել է Եվրասիական տնտեսական միության մասին պայմանագրի ստորագրման 10-ամյակը)։

Նիստի ընթացքում միութենական շուկայում առկայությունն ապահովելու համար փոփոխություններ են կատարվել դեղերի գրանցման և փորձաքննության կանոններում, սահմանվել են հետագա քայլեր՝ որոշելու հարկային ինտենսիվ ապրանքների ցանկը, որոնց առնչությամբ պետք է որոշվեն ռիսկի նվազագույն ցուցանիշներ՝ ապրանքների մաքսային արժեքը վերահսկելու նպատակով։

Բացի այդ, քննարկվել է նաև միությունում կլիմայի ավելի սերտ կարգավորման անհրաժեշտությունը, հավանության են արժանացել անդրսահմանային շուկաներում մրցակցության վիճակի մասին հանձնաժողովի զեկույցը և հանձնաժողովի զեկույցը ԵԱՏՄ արևելյան երկրների տարածքներում տրանսպորտային ենթակառուցվածքների զարգացման վերաբերյալ՝ Արևելք-Արևմուտք և Հյուսիս-Հարավ ուղղություններով, այդ թվում՝ չինական «Մեկ գոտի՝ մեկ ճանապարհ» նախաձեռնության հետ զուգահեռ։

Նշվում է նաև, որ տեղի ունեցած նիստում ԵՏՀ Խորհուրդը որոշել է հաստատել ծխախոտի ակցիզային հարկի միասնական ցուցիչ դրույքաչափը 2029 թվականի համար, ինչպես նաև ԵԱՏՄ անդամ երկրներում գործող ակցիզային հարկի փաստացի դրույքաչափերի շեղման միջակայքը՝ հաստատված ինդիկատիվ դրույքաչափից։

Հանդիպման ընթացքում համաձայնեցվել է նաև Եվրասիական միջկառավարական խորհրդի հաջորդ նիստի օրակարգի նախագիծը։