Անդերս Ֆոգ Ռասմուսենի գլխավորած խմբի զեկույցը կոչ է անում քաղաքական և նյութական աջակցություն ցուցաբերել «Խաղաղության խաչմերուկ» նախագծին
2 րոպեի ընթերցում
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ։ Հայաստանի և Ադրբեջանի միջև խաղաղության համաձայնագրի բացակայությունը չպետք է խոչընդոտ հանդիսանա «Խաղաղության խաչմերուկ»-ի և նմանատիպ այլ նախաձեռնություններում ներդրումներ կատարելու համար։ Ընդհակառակը, դա կարող է ավելի թուլացնել լարվածությունն ու մոտեցնել խաղաղությունը Հարավային Կովկասում։
«Արմենպրես»-ի հաղորդմամբ՝ այս մասին նշվում է Դանիայի նախկին վարչապետ և Հյուսիսատլանտյան դաշինքի նախկին գլխավոր քարտուղար Անդերս Ֆոգ Ռասմուսենի գլխավորած «Հայաստանի բարեկամներ ցանց» բարձր մակարդակի խմբի հրապարակած զեկույցում, որը նվիրված է Հայաստանի ու Եվրոպական միության միջև հարաբերություններին, դրանց հետագա ամրապնդման անհրաժեշտությանը, Հայաստանի՝ կազմակերպությանը վերջնական անդամակցելուն, ինչպես նաև Հարավային Կովկասում առկա իրադրությանն ու Հայաստանին սպառնացող վտանգներին։
Անդրադառնալով Հարավային Կովկասում տրանսպորտային ուղիների ապաշրջափակմանը՝ զեկույցում վկայակոչվում է ՀՀ կառավարության կողմից ներկայացված «Խաղաղության խաչմերուկ» նախաձեռնությունը, որը նպատակ ունի Հայաստանի տարածքով ստեղծել տրանսպորտային կապուղիներ, որոնք պետք է լինեն երկրների իրավասության և ինքնիշխանության ներքո՝ հիմնված փոխադարձության և հավասարության սկզբունքի վրա։
Զեկույցի հեղինակների կարծիքով՝ «Խաղաղության խաչմերուկ» նախաձեռնությունը կխթանի առևտուրը, փոխկախվածությունը և կապը Հարավային Կովկասում, ինչպես նաև կնպաստի Հայաստանի և նրա հարևանների միջև հարաբերությունների լիարժեք կարգավորմանը։ Նախաձեռնությունը կպահանջի էական ներդրումներ երկաթուղային, ճանապարհային և սահմանային ոլորտներում։
Զեկույցում անդրադարձ է կատարվում նաև Հայաստանում Եվրոպական միության առաքելության (EUMA) գործունեությանը՝ հավելելով, որ Ադրբեջանը հրաժարվել է իր տարածքում նմանատիպ առաքելություն տեղակայել, ինչը ցույց է տալիս Բաքվի իրական մտադրությունները։ Նշվում է նաև այդ առաքելության անձնակազմի թվի մեծացման և նրանց տեխնիկական կարողությունները զարգացնելու անհրաժեշտության մասին։